Қазақстанның Ferro-Alloy Resources (FAR) компаниясы америкалық Maglut Heavy Industries компаниясымен Қызылорда облысындағы Баласаусқандық кен орнынан алынатын сирек жер металдарының концентратын жеткізу мүмкіндігін зерттеу туралы келісім жасады, деп хабарлайды dalanews.kz.
Жоба бастапқыда ванадий өндіруге бағытталған болатын. Алайда кен құрамынан сирек жер металдарының 16 түрі анықталғандықтан, оларды да бөліп алып, экспортқа шығару мәселесі қарастырылып жатыр.
Сынақ барысында иттрий, неодим, празеодим, диспрозий және тербий бойынша тазалығы 99%-дан асатын өнім алынған. Бір кезеңдегі орташа металл алу көрсеткіші 91,4%-ды құрады.
Егер технология өнеркәсіптік деңгейде енгізілсе, Қазақстан алдағы бес жыл бойы америкалық тарапқа жыл сайын 1 мың тоннаға дейін сирек жер металдарының концентратын жеткізе алады. Бұдан бөлек, қуаты жылына 100 тоннаға дейін жететін тағы бір жоба қарастырылып жатыр.
Сарапшылардың назарын әсіресе иттрий металы аударып отыр. Бұған дейін FAR компаниясы кен орындарының біріндегі иттрий қорының болжамды құнын шамамен 3,6 млрд доллар деп бағалаған.
Дегенмен бұл сома Қазақстан дәл осынша табыс табады дегенді білдірмейді. Әңгіме жер қойнауындағы металдың алдын ала есептелген құны туралы болып отыр. Одан кейін кен өндіру, өңдеу шығындары мен өндірістік шығындар шегеріледі.
Қазіргі уақытта кен орнындағы қорларды SRK Consulting компаниясы қайта бағалап жатыр. Жаңалық жарияланғаннан кейін FAR акциялары шамамен 35%-ға қымбаттады.
