Qazaqstan aldaǵy jyldary bazalyq mólsherlemeni eń kóp tómendetetin óńir elderiniń birine ainalýy múmkin. Aziia damý bankiniń qyrkúiektegi boljamy osyndai úrdisti kórsetip otyr, dep habarlaidy dalanews.kz.
Nege.Aqsha málimetine sáikes, 2027 jyldyń sońyna deiin Qazaqstandaǵy bazalyq mólsherleme 2026 jylǵy 4 qyrkúiektegi kórsetkishpen salystyrǵanda shamamen 3,2 paiyzdyq tarmaqqa tómendeýi múmkin. Bul – óńirdegi eń úlken jiyntyq tómendeý.
4 qyrkúiekte bazalyq mólsherleme 16,25% deńgeiinde boldy. Ulttyq bank maýsymnan beri mólsherlemeni úsh ret qaita qarap, 18%-dan 17%-ǵa, keiin 16,75%-ǵa jáne 16,25%-ǵa deiin túsirdi. Iaǵni osy kezeń ishinde kórsetkish 1,75 paiyzdyq tarmaqqa tómendedi.
Aziia damý banki bul úrdis 2027 jyly da jalǵasýy múmkin dep esepteidi. Oǵan eldegi infliatsiialyq qysymnyń birtindep báseńdeýi negiz bolýy yqtimal. Boljam boiynsha, Qazaqstanmen qatar Ózbekstanda da aqsha-kredit saiasatyn jumsartý jalǵasady. Osy eki elde mólsherlemeniń jiyntyq tómendeýi óńirdegi basqa memleketterge qaraǵanda joǵary bolýy múmkin.
Eger ADB boljamyndaǵy stsenarii júzege assa, Qazaqstandaǵy bazalyq mólsherleme 2027 jyldyń sońynda shamamen 13%-ǵa deiin túsýi yqtimal. Degenmen bul kórsetkishti banktiń naqty mejesi dep qabyldaýǵa bolmaidy. 13% – qazirgi 16,25% mólsherlemeden boljanǵan 3,2 paiyzdyq tarmaq tómendeýdi alyp tastaý arqyly eseptelgen shamamen alynǵan kórsetkish.
Sonymen birge ADB Qazaqstan ekonomikasynyń 2026 jyly 4,8%, al 2027 jyly 4,5% ósetinin boljap otyr. Ortasha jyldyq infliatsiia biyl 10,4%, kelesi jyly 9,5% deńgeiinde bolady degen boljam bar.
Mólsherlemege qatysty baǵalaý Focus Economics jinaqtaǵan júzdegen sarapshy men uiymnyń boljamdaryna negizdelgen.
