Қазақстан алдағы жылдары базалық мөлшерлемені ең көп төмендететін өңір елдерінің біріне айналуы мүмкін. Азия даму банкінің қыркүйектегі болжамы осындай үрдісті көрсетіп отыр, деп хабарлайды dalanews.kz.
Nege.Aqsha мәліметіне сәйкес, 2027 жылдың соңына дейін Қазақстандағы базалық мөлшерлеме 2026 жылғы 4 қыркүйектегі көрсеткішпен салыстырғанда шамамен 3,2 пайыздық тармаққа төмендеуі мүмкін. Бұл – өңірдегі ең үлкен жиынтық төмендеу.
4 қыркүйекте базалық мөлшерлеме 16,25% деңгейінде болды. Ұлттық банк маусымнан бері мөлшерлемені үш рет қайта қарап, 18%-дан 17%-ға, кейін 16,75%-ға және 16,25%-ға дейін түсірді. Яғни осы кезең ішінде көрсеткіш 1,75 пайыздық тармаққа төмендеді.
Азия даму банкі бұл үрдіс 2027 жылы да жалғасуы мүмкін деп есептейді. Оған елдегі инфляциялық қысымның біртіндеп бәсеңдеуі негіз болуы ықтимал. Болжам бойынша, Қазақстанмен қатар Өзбекстанда да ақша-кредит саясатын жұмсарту жалғасады. Осы екі елде мөлшерлеменің жиынтық төмендеуі өңірдегі басқа мемлекеттерге қарағанда жоғары болуы мүмкін.
Егер АДБ болжамындағы сценарий жүзеге асса, Қазақстандағы базалық мөлшерлеме 2027 жылдың соңында шамамен 13%-ға дейін түсуі ықтимал. Дегенмен бұл көрсеткішті банктің нақты межесі деп қабылдауға болмайды. 13% – қазіргі 16,25% мөлшерлемеден болжанған 3,2 пайыздық тармақ төмендеуді алып тастау арқылы есептелген шамамен алынған көрсеткіш.
Сонымен бірге АДБ Қазақстан экономикасының 2026 жылы 4,8%, ал 2027 жылы 4,5% өсетінін болжап отыр. Орташа жылдық инфляция биыл 10,4%, келесі жылы 9,5% деңгейінде болады деген болжам бар.
Мөлшерлемеге қатысты бағалау Focus Economics жинақтаған жүздеген сарапшы мен ұйымның болжамдарына негізделген.
