Qazaqstanda jalpyǵa birdei deklaratsiialaýdyń III jáne IV kezeńderiniń kúshin joiý týraly petitsiia jariialandy. Onda tabysynyń jartysynan kóbi tek isher asyna ketetin qara halyqty bos áýrege salmai, deklaratsiialaýdan bosatý suralady, dep habarlaidy Dalanews.kz.
Petitsiia avtorlary "Qazaqstan jetkilikti deńgeide tsifrlandyrylǵan jáne memlekettik kirister organdary barlyq banktik operatsiialardy kórip-bilip otyr dep sanaidy.
"Sondyqtan halyqty jappai deklaratsiialaýǵa tartýǵa negiz joq. Tapqan tabysynyń jartysynan kóbin tamaqqa jumsaityn, onyń ústine nesiege ábden belshesinen batqan qara halyqty deklaratsiialaýdyń ne keregi bar... Jalpy deklaratsiialaý talaby engizilgen qoldanystaǵy salyq zańnamasynda, kerisinshe, qoǵamǵa túk paidasy joq salyq mindettemelerin teris paidalanýǵa múmkindik berip qana qoimai, sonymen qatar, tipti salyqtyq jeńildikterdi de qamtityn normalar bar", delingen petitsiiada.
Qujat avtorlary jalpyǵa birdei deklaratsiialaýdyń III jáne IV kezeńderiniń kúshin joiý nemese ony zań turǵysynda naqtylanbaǵan tustaryn túzep alý úshin bes jylǵa shegere turýdy suraidy.
Atalǵan petitsiia mátinimen myna aradan tanysýǵa bolady.
Aita ketsek, jalpyǵa birdei deklaratsiialaýdyń III kezeńinde, iaǵni 2024 jyldyń 1 qańtarynan bastap zańdy tulǵalardyń basshylary, quryltaishylary (qatysýshylary) jáne dara kásipkerler, sondai-aq olardyń jubailary (zaiyptary) bolyp tabylatyn barlyq jeke tulǵalar bar tabysy boiynsha esep berýi tiis. Al IV kezeńde, iaǵni 2025 jylǵy 1 qańtardan bastap aktivter men mindettemeler týraly deklaratsiiany qalǵan azamattar (mysaly, jeke qurylymdardyń qyzmetkerleri, zeinetkerler, úi sharýasyndaǵy áielder, stýdentter jáne basqalar) tapsyrady.
Buǵan deiin deklaratsiia tapsyrmaǵandarǵa bir ai múmkindik berilgenin jazǵan bolatynbyz. Al osy merzimde ony ótkizbegenderdiń bank shottary buǵattalýy múmkin ekeni de eskertilgen.
