Memleket basshysy Qasym-Jomart Toqaev agroónerkásip kesheni eldiń, ásirese aýyl turǵyndarynyń ómir sapasyna tikelei áser etetinin atap ótti, dep habarlaidy Dalanews.kz.
"Sol sebepti men aýyldy órkendetý isine airyqsha mán beremin. Buǵan sailaý aldyndaǵy tuǵyrnamada erekshe nazar aýdardym. Prezident sailaýynan keiin alǵashqy Jarlyǵym aýyldy damytýǵa arnaldy. Meniń tapsyrmammen Úkimet bes jyldy qamtityn tujyrymdama qabyldady. "Aýyl – el besigi" baǵdarlamasy ázirlenip, júzege asyrylyp jatyr. Qazirdiń ózinde naqty nátije bar. Biyl 200-ge jýyq aýylǵa sý qubyryn tartý úshin qarjy bólindi. Jyl sońyna deiin aýyl halqynyń 95 paiyzdan astamy taza sýmen qamtamasyz etiledi. Aýyldaǵy densaýlyq saqtaý júiesin jańǵyrtý úshin arnaiy joba qolǵa alyndy. Búginge deiin 140-tan astam nysan salyndy. "Jaily mektep" ulttyq jobasy aiasynda biyl 13 aýyl mektebi paidalanýǵa berildi. Sońǵy bes jylda jergilikti mańyzy bar 38 myń shaqyrym jol jóndeldi. Mańyzdy mindettiń biri – aýyl halqynyń tabysyn arttyrý. «Aýyl amanaty» baǵdarlamasy arqyly jyldyq ósimi 2,5 paiyz bolatyn shaǵyn nesie berile bastady. Sonyń nátijesinde aýylda 16 myńǵa jýyq jańa jumys orny ashyldy. Osyndai aýqymdy jumys jalǵasyn tabady. Sebebi aýyldy kórkeitý – strategiialyq mindet. Buryn jabylyp qalǵan keibir aýdandar byltyr meniń tapsyrmammen qaita quryldy. Bul – ásirese, shetkeri ornalasqan eldi mekenderge serpin beretin qadam", - dedi ol.
