Prezident Qasym-Jomart Toqaev memlekettik qyzmetkerlerdiń syiaqy alýlaryna qatysty oiyn aitty, - dep habarlaidy Dalanews.kz.
Prezident Qarjy ministrligi syiaqy alýǵa tyiym salýǵa negiz joq ekenin túsindirip bergenin atap ótti.
"Memlekettik qyzmetshiler – eldegi júieli ózgeristerdiń basty jolbasshylary. Olardyń tabysy aitarlyqtai kóp emes. Kei kezderi túnimen jumysta otyrady. Memlekettik qyzmetshilerdiń de otbasy men mindeti, qala berdi qarapaiym adam retindegi qalaýy men jospary bar. Memlekettik organdardyń tiimdiligin arttyrý úshin qatardaǵy qyzmetkerlerdiń eńbekaqysy básekege qabiletti bolýy kerek dep oilaimyn. Syiaqy atalǵan máseleni sheshýge múmkindik beredi. Basqa jolmen memlekettik qyzmetke bilikti mamandardy tartyp, kadr turaqsyzdyǵy problemasyn sheshý qiyn. Úkimet azamattarǵa áleýmettik kómek berý júiesin qaita qaraýy kerek. Soǵan sáikes tiisti tapsyrma berildi. Memleketten beriletin ataýly áleýmettik kómekti shyn máninde muqtaj azamattar alýǵa tiis. Alaida keibir aýyldyq jerde bir otbasydan birneshe adam ataýly áleýmettik kómek alatyn jaǵdailar jii kezdesedi. Ókinishke qarai ondai azamattarymyz jumys istep, eńbek etýge de qulyqsyz. Sebebi memleketten túsetin járdemge senedi. Bul, árine, durys emes. Túptep kelgende, mundai áreket áleýmettik masyldyqty týǵyzyp otyr.
Prezident Ádiletti Qazaqstandy qurý jolynda naqty qadamdar jasalyp jatqanyn atap ótti.
"Barlyq saladaǵy jumystyń ashyq bolýyna kóńil bólip otyrmyz. Osy oraida azamattarymyzdyń tabysyn jappai deklaratsiialaýdyń mán-mańyzy zor. Bul talap 2021 jyldan beri birtindep engizilip jatyr. Alǵashqy úsh kezeńde 4 millionnan astam adam deklaratsiia tapsyrdy. Olardyń qatarynda memlekettik qyzmetshiler, kvazimemlekettik sektordaǵy basshylar, kásipkerler jáne osy sanatqa kiretin azamattardyń jubailary bar. Kelesi jyly taǵy 8 millionǵa jýyq adam deklaratsiia tapsyrady dep josparlanyp otyr.
Alaida bir máseleni eskerý qajet. Jappai deklaratsiia tapsyrý tujyrymdamasy osydan 14 jyl buryn qabyldanǵan. Sodan beri elimizde tsifrlandyrý isi jáne finteh salasy qarqyndy damyp kele jatyr. Túrli memlekettik mekemelerge ortaq málimetter bazasy paida boldy. Qarjy jáne salyq baqylaýy kúsheidi. Demek osyndai aýqymdy ózgeristerden keiin tórtinshi, iaǵni, sońǵy kezeńde azamattardy deklaratsiia tapsyrýǵa mindetteý qanshalyqty oryndy degen suraq týady. Úkimet bul máseleni jan-jaqty pysyqtaýy qajet", - dedi Toqaev.
