Memleket basshysy Qasym-Jomart Toqaev Ádiletti Qazaqstandy qurý jolynda naqty qadamdar jasalyp jatqanyn, memleket barlyq saladaǵy jumystyń ashyq bolýyna kóńil bólip otyrǵanyn málimdedi,- dep habarlaıdy Dalanews.kz.
Prezıdent azamattardyń tabysyn jappaı deklarasıalaýdyń mán-mańyzy zor ekenine toqtaldy.
"Bul talap 2021 jyldan beri birtindep engizilip jatyr. Alǵashqy úsh kezeńde 4 mıllıonnan astam adam deklarasıa tapsyrdy. Olardyń qatarynda memlekettik qyzmetshiler, kvazımemlekettik sektordaǵy basshylar, kásipkerler jáne osy sanatqa kiretin azamattardyń jubaılary bar. Kelesi jyly taǵy 8 mıllıonǵa jýyq adam deklarasıa tapsyrady dep josparlanyp otyr. Alaıda bir máseleni eskerý qajet.
Jappaı deklarasıa tapsyrý tujyrymdamasy osydan 14 jyl buryn qabyldanǵan. Sodan beri elimizde sıfrlandyrý isi jáne fınteh salasy qarqyndy damyp kele jatyr. Túrli memlekettik mekemelerge ortaq málimetter bazasy paıda boldy. Qarjy jáne salyq baqylaýy kúsheıdi. Demek osyndaı aýqymdy ózgeristerden keıin tórtinshi, ıaǵnı, sońǵy kezeńde azamattardy deklarasıa tapsyrýǵa mindetteý qanshalyqty oryndy degen suraq týady. Úkimet bul máseleni jan-jaqty pysyqtaýy qajet", - dedi Toqaev.
Aıta keteıik, buǵan deıin Qazaqstanda jalpyǵa birdeı deklarasıalaýdyń III jáne IV kezeńderiniń kúshin joıý týraly petısıa jarıalandy. Onda tabysynyń jartysynan kóbi tek isher asyna ketetin qara halyqty bos áýrege salmaı, deklarasıalaýdan bosatý suralady.
"Sondyqtan halyqty jappaı deklarasıalaýǵa tartýǵa negiz joq. Tapqan tabysynyń jartysynan kóbin tamaqqa jumsaıtyn, onyń ústine nesıege ábden belshesinen batqan qara halyqty deklarasıalaýdyń ne keregi bar... Jalpy deklarasıalaý talaby engizilgen qoldanystaǵy salyq zańnamasynda, kerisinshe, qoǵamǵa túk paıdasy joq salyq mindettemelerin teris paıdalanýǵa múmkindik berip qana qoımaı, sonymen qatar, tipti salyqtyq jeńildikterdi de qamtıtyn normalar bar", - dep jazylǵan petısıada.
