“Ulttyq aqparattyq tehnologıalar” aksıonerlik qoǵamy eGov Mobile qosymshasyna jańa fýnksıalar engizilgenin málimdedi, dep habarlaıdy Dalanews.kz.

Endi áskerı qyzmet týraly aqparatty qosymsha arqyly alý jáne jiberý múmkindigi paıda boldy. Bul jańalyq Sandyq aqparat qyzmetiniń jańartylýynan keıin júzege asty.

Qosymshanyń jańa nusqasy arqyly kelesi derekter qoljetimdi bolady:

•Áskerı qyzmetke shaqyrý týraly aqparat – azamattyń shaqyrý mártebesi men merzimi jaıly tolyq málimetter.

•Áskerı qyzmetke qatysý týraly aqparat – áskerı mindettilik mártebesine qatysty ózekti derekter.

Qazaqstandyqtar jeke derekterin JSN, kompanıanyń BSN nemese mobıldi azamattar bazasynda tirkelgen telefon nómiri arqyly óz betimen jibere alady. Sonymen qatar, derekterdi jumys berýshiniń suraý salýy boıynsha da jiberý múmkindigi bar. Bul jaǵdaıda jumys berýshi JSN nemese telefon nómiri arqyly suraý jiberedi. Paıdalanýshyǵa habarlama kelip, ol suraýdy rastaýy nemese qabyldamaýy qajet. Derekterdi eGov Mobile qosymshasyndaǵy arnaıy silteme arqyly messendjerler nemese elektrondy poshta arqyly jiberýge de bolady.

Servısti qoldaný tártibi:

1.eGov Mobile qosymshasynda avtorızasıa jasap, “Málimetter” bólimin ashý.

2.“Tarıh” bóliminen málimetterge qoljetimdilik suraýlarynyń tizimin qarap shyǵý.

3.Málimetterdi berýge ruqsat berý nemese suraý salýdy qabyldamaý batyrmasyn basý.

4.Qajet bolsa, buryn berilgen málimetterdi “Qaıtaryp alý” batyrmasyn paıdalanyp keri qaıtarý.

Jańartylǵan fýnksıalar eGov Mobile qosymshasynyń qoljetimdiligin arttyryp, azamattarǵa yńǵaıly bolý úshin jasalǵan.