AMANAT partiiasynyń ókilderi Biz Birgemiz Qazaqstan qaiyrymdylyq qorymen eshqandai bailanysy joq ekenin resmi túrde málimdedi, dep habarlaidy Dalanews.kz.
“Búginde BAQ pen áleýmettik jelilerde AMANAT partiiasynyń Biz Birgemiz qorynyń jumysyna qatysy bar degen aqparat tarap jatyr. Osyǵan bailanysty, AMANAT partiiasy Biz Birgemiz qorynyń quryltaishysy sanalmaitynyn (tolyq ataýy: “Biz Birgemiz Qazaqstan 2030” QB) jáne onyń qyzmetine eshqandai qatysy joq ekenin túsindire ketkenimiz jón", – dedi olar.
Partiia ókilderi Telegram arnasynda sý tasqyny kezinde jasaǵan jumystaryna toqtalyp ótti.
“Aita keteiik, biyl sáýir aiynda AMANAT partiiasynyń "Jastar Rýhy" jastar qanaty sý tasqyny kezeńinde apattan zardap shekken turǵyndarǵa kómek kórsetip, aýqymdy jumys júrgizdi. Belsendiler men volonterler kóptegen qaiyrymdylyq uiymy, sonyń ishinde Biz Birgemiz Qazaqstan 2030 QB qory jinaǵan gýmanitarlyq kómekti jetkizýge atsalysty", - delingen habarda.
Aita keteiik, Biz Birgemiz qorynda Perizat Qairattan bólek 10 quryltaishy bar ekenin Dalanews.kz "Ulysmediaǵa" siltep habarlaǵan edi.
Resmi ashyqderekkózderdegi málimet boiynsha, qordyń alǵash Astana qalasynyń Ádilet departamenti 2021 jyly qarashada tirkegen. Qordyń tolyq ataýy – "Biz Birgemiz Qazaqstan 2030" qoǵamdyq birlestigi.
Qordyń quryltaishylarynyń tiziminde Perizat Qairattyń ózimen qosqanda 10 adam bar. Olar:
- Matiýshenko Sergei Vladimirovich
- Maǵzum Arslanbek Talǵatuly
- Turǵanbai Shadiiar Doktoruly
- Amanbai Arýjan Orazbaiqyzy
- Bolysov Tohtar Kommýnarovich
- Hismatýllin Damir Sakenovich
- Serikjanova Aigerim Teljanovna
- Seitkamal Gúlnaz Nurlanqyzy
- Hafiz Aian Baýyrjanuly.
Tizimdegi quryltaishylardyń birazynyń esimi Amanat partiiasymen bailanysty. Máselen, Sergei Matiýshenko partiianyń Astana qalasy Baiqońyr aýdandyq filialynyń atqarýshy hatshysy. Elordalyq Azamattyq aliansty direktory bolǵanyn áleýmettik jelide jazady. Ózin jelide qazaq tilin biletin ýkrain dep tanystyrady.
Maǵzum Arslanbek Astana qalasy «Amanat» partiiasy janyndaǵy «Jastar Rýhy» JQ filialynyń tóraǵasy. 2023 jylǵy 29 naýryzda Astana qalasy máslihatynyń VIII sailanymynyń depýtaty bolyp sailanǵan.
Bolysov Tohtar Kommýnarovich ashyq derekkózderde INMODE jáne CONSULT-INVEST ITIC kompaniiasynyń jetekshisi retinde kórsetilgen. Onyń sonymen birge, Ǵylym jáne joǵary bilim ministriniń jastar saiasaty jóninde keńesshisi ekeni jazylǵan. 2018-2024 jyldar aralyǵynda Qazaqstan jastar kongresiniń atqarýshy direktory bolǵan.
Serikjanova Aigerim Teljanovna Amanat partiiasy janyndaǵy "Jastar Rýhy "Jastar qanaty" qoǵamdyq birlestiginiń Astana qalalyq filialynyń burynǵy quryltaishysy jáne SAT MEDIA kompaniiasynyń basshysy.
Hafiz Aian Baýyrjanuly – Amanat partiiasy janyndaǵy "Jastar Rýhy" Jastar qanaty " qoǵamdyq birlestiginiń Astana qalalyq filialynyń burynǵy quryltaishysy. Tizimdegi basqa quryltaishylar jóninde ashyq aqparat kózderinde málimet tabylmady.
Eske salaiyq, kúni keshe Qarjylyq monitoring agenttigi eriktiler qozǵalysynyń belsendisi jáne qoǵamdyq qaiyrymdylyq qorynyń quryltaishysy Perizat Qairatqa qatysty tergeý júrgizilip jatqanyn habarlaǵan bolatyn.
Ol kóktemgi sý tasqynynan zardap shekken azamattarǵa kómektesý úshin jinalǵan 1,5 mlrd teńgeden astam qarajatty jymqyrdy dep kúdiktelýde.
Qaiyrymdylyqtyń negizgi bóligi qymbat sán buiymdary men jyljymaityn múlikti satyp alý maqsatyna paidalanyldy.
Biyl kóktemde ol elordadaǵy avtosalondarda 88 mln teńgege "Mercedes-Benz S450", 80 mln teńgege "Lexus LX-600" jáne 39 mln teńgege "Haval" avtokólikterin satyp aldy.
Osy kezeńde ol jalpy somasy 600 mln teńgeni quraityn elordanyń premiým sanattaǵy "Akbulak Riviera", "Highvill Ishim Gold", "Kók Jailaý" TK (turaq oryndaryn qosa alǵanda), sondai-aq "Vela Village" kottedj qalashyǵynda jyljymaityn múlik nysandaryn satyp aldy.
Sonymen qatar, qazaqstandyqtardyń qaiyrymdylyqqa jibergen qarajat esebinen Perizat Q. Dýbai, Doha, London jáne Stambýldaǵy «St. Regis», «Shangri-La», «Palazzo Versace» jáne «Kempinski» siiaqty bes juldyzdy qonaq úilerde demalǵan.
Bul elderde ol "Cartier" jáne "Louis Vuitton" siiaqty brendterdiń qymbat aksessýarlary men zergerlik buiymdardy satyp alyp, feshenebeldi meiramhanalarǵa baryp, iahtalardy jaldaǵan.
Qylmystyq shemany júzege asyrý úshin dostary men týystaryna 8% syiaqy berip, qordyń aqshasy qolma-qol aqshaǵa ainaldyryp otyrǵan.
Osylaisha, Perizat Q. óziniń zańsyz áreketterimen eriktiler qozǵalysynyń bedeline nuqsan keltirip, onyń ashyqtyq pen adaldyq printsipterine kúmán keltirdi jáne halyqtyń senip tapsyrǵan qarajatyn talan-tarajǵa salǵan.
