Qazaqstan men Koreia Respýblikasynyń prezidentteri shaǵyn quramda kelissóz júrgizdi, dep habarlaidy dalanews.kz.
Qasym-Jomart Toqaev Koreia Respýblikasyna saparmen kelýge shaqyrǵany úshin Li Chje Miońge rizashylyǵyn bildirdi.
"Koreia Respýblikasy Qazaqstannyń strategiialyq seriktesi sanalady. Halyqtarymyzdy erteden berik dostyq pen ózara túsinistik, tyǵyz mádeni-gýmanitarlyq qarym-qatynas bailanystyrady. Elderimizdiń arasynda tek dostyq ornaǵan, eshqandai daý joq. Aldymyzdaǵy maqsat – ekijaqty qatynastardy odan ári damytý. Búgin tańerteń jaqsy biznes-forým ótti. Menimen birge Koreiaǵa úlken biznes delegatsiia keldi. Ártúrli salada óte tartymdy jobalar júzege asyrylýda. Josparymyz da óte myqty. Onyń ishinde Alatau City jobasyn odan ári damytý máselesin jiti talqyladyq. Bul – shyn máninde óte qajetti jáne mańyzdy joba. Biz oǵan úlken mán beremiz. Qala mártebesine qatysty erejelerdi Konstitýtsiiamyzǵa engizdik. Zań turǵysynan koreilik kompaniialarǵa barlyq kepildik beriledi. Qazaqstanda korei ultynyń 120 myńnan astam ókili turady. Olarǵa barlyq jaǵdai jasalǵan, korei diasporasy – qoǵamymyzdyń belsendi músheleri", – dedi Prezident.
Memleket basshysy korei generaly Hon Bom Doǵa arnaiy toqtaldy.
"Hon Bom Donyń tarihymen jaqsy tanyspyn. Ol – naǵyz qaharman, otansúigish tulǵa. Ony jadymyzda saqtaý úshin ózara parasatty is atqardyq dep aitýǵa negiz bar. Bul oqiǵaǵa júz jyldan asa ýaqyt ótip ketse de, korei halqy óz generalyn umytpaǵany tańǵalarlyq jait. Batyrdy este qaldyrý úshin onyń súiegin otanyna qaitaryp, azamattyq paryzymyzdy oryndadyq", – dedi Qasym-Jomart Toqaev.
Prezident eki eldiń túrli baǵyttaǵy yqpaldastyǵynyń qazirgi jai-kúii men keleshegin joǵary baǵalady.
"Ekijaqty qarym-qatynasqa toqtalsaq, sapar barysynda 19 milliard dollardy quraityn kommertsiialyq kelisimderge qol qoiyldy. Korei investorlarynyń jumysyna kóńilimiz tolady, aldaǵy ýaqytta da osy baǵyttaǵy bailanystardy jalǵastyramyz. Qonaq úi, munai óńdeý zaýytyn salý jáne qala qurylysy boiynsha jaqsy josparlarymyz bar. Ásirese, mádeni-gýmanitarlyq yntymaqtastyqty nyǵaitýǵa den qoiamyz", – dedi Memleket basshysy.
