Sońǵy ýaqyttary «Ózenmunaıgaz» AQ-y munaıshylary men mekemede jumys istep zeınetke shyqqan azamattar (burynǵy qyzmetkerler) biraz talaptaryn qoıǵan bolatyn. Búgin «QazMunaıGaz» UK AQ osy máselege baılanysty málimdeme jasady, – dep habarlaıdy Dalanews.kz.
«QazMunaıGaz» komapnıasynyń Telegram arnasyna jarıalanǵan habarlamada ÓMG zeınetkerleriniń (burynǵy qyzmetkerleriniń) balalary kompanıanyń shtatyna tikeleı alynsa, 2020 jyly bekitilgen jumysqa ornalasý algorıtmin buzalatynyn alǵa tartqan. Sonymen qatar habarlamada «Algorıtmge sáıkes ÓMG zeınetkerleriniń balalary men jumyssyz azamattar 50/50 proporsıasy boıynsha teń dárejede jumysqa qabyldanady. Bul talapty oryndaý múmkin emes, óıtkeni jumysqa ornalasý kezegin kútip otyrǵan Jańaózen qalasynyń basqa jumyssyz turǵyndarynyń quqyǵyn buzady» delingen.
Budan basqa habarlamada zeınetke erte shyqqanda tólem mólsherin 300 AEK ulǵaıtý máselesine qatysty da jaýap qaıtarylypty. «ÓMG-de jumysshylarǵa merziminen buryn zeınetke shyǵýǵa múmkindik beretin arnaıy baǵdarlama bar. Zeınet jasyna jaqyndaǵan qyzmetkerlerge arnalǵan baǵdarlamanyń talaptary aılyq eseptik kórsetkishke (AEK), munaıshynyń ótili men jasyna baılanysty, sonymen qatar otbasy múshesin jumysqa ornalastyrý múmkindigi de qarastyrylǵan.
Tólem mólsheri jumysshynyń ótiline jáne zeınetke shyǵýǵa deıin qalǵan aılar sanyna baılanysty AEK negizinde esepteledi. Bul rette, tólemaqynyń eń joǵary mólsheri 125 AEK – 40 jyldan astam eńbek ótili bar qyzmetkerler úshin belgilengen.
Mysaly, ÓMG-de 40 jyldan astam jumys istegen qyzmetker búginde 60 jasqa kelip erte zeınetke shyqsa, 16,6 mln teńge alady» delenigen habarlamada.
Jumysshylar kásipodaǵy qoıyp otyrǵan talap – AEK mólsherin 125-ten 300 AEK-ke deıin ulǵaıtý, bul tólem mólsherin eki eseden astamǵa arttyratyny belgili. Alaıda kompanıa munaıshylarǵa qazirdiń ózinde jaqsy jaǵdaı jasalǵanyn, bir qyzmetkerge kórsetiletin áleýmettik qoldaý mólsheri – eń joǵary kórsetkishke sáıkes keletinin alǵa tartypty.
Budan basqa uńǵymalarǵa qyzmet kórsetý basqarmasy janynan 1000 oryndyq arnaıy tehnıkany jóndeıtin baza salý isine qatysty da «QazMunaıGaz» AQ óz ustanymyn ashyq bildiripti.
«ÓMG jyl saıyn arnaıy tehnıkany jańartyp otyrady. Qazirgi ýaqytta burǵylaý jumystary basqarmasynyń tehnıkasyn qosa alǵanda, avtoparktiń 65% jańartyldy. 2022-2024 jyldar aralyǵynda buǵan 22 mlrd teńgeden asa qarjy jumsaldy, al 2029 jylǵa deıin taǵy 53 mlrd teńgeden astam bólinetin bolady. Tehnıkany jańartýdyń nátıjesinde jóndeý jumystary azaıdy, sondyqtan jumysshylar talap etkendeı jańa jóndeý bazasyn salý tıimsiz bolyp otyr. Arnaıy tehnıkany jańartý jumystary QMG tobynyń barlyq kompanıasynda júrgizilip jatyr» dep «QazMunaıGaz» buǵan da naqty jaýap qaıtarypty.
Sondaı-aq, munaıshylar kótergen ujymdyq sharttyń 2013 jylǵy redaksıasyn qaıtarý jáne derbes eńbekaqy tóleý júıesine ótý máselesine qatysty tómendegideı jaýap qaıtarylǵan.
«Kásipodaq 2013 jyly qoldanysta bolǵan ÓMG ujymdyq shartynyń 5.19 tarmaǵyn qaıtarýdy usynady. Bul tarmaq boıynsha jeke tabys salyǵy men mindetti zeınetaqy jarnalary jumys berýshiniń esebinen tólenip kelgen. Al 2017 jyldan beri qyzmetkerlerge jalaqy salyq ustalǵannan keıin beriledi, bul QR zańnamasyna tolyǵymen sáıkes keledi.
2024 jyldyń shildesinde Ózenmunaıgaz kompanıasynda eńbekaqy tóleýdiń jańa júıesine ótý jumystary bastaldy. Kásipodaqtar men QR Eńbek mınıstrliginiń qatysýymen kúrdeli jumysty ádil baǵalaýǵa negizdelgen erejeler ázirlendi. Qazirgi ýaqytta ÓMG ishinde ózara kelisimder júrip jatyr» delingen habarlamada.
Al uńǵymalardy jerasty jáne kúrdeli jóndeý mashınısteri men operatordyń sanatyn 6-7-shi dárejege kóterý máselesine qatysty munaıshylar tómendegideı jaýap aldy.
«Jumysshynyń dárejesi QR Eńbek mınıstrliginiń 2018 jylǵy buıryǵymen bekitilgen Biryńǵaı tarıftik-biliktilik anyqtamalyǵy boıynsha belgilenedi. Qazir kúrdeli jumystarǵa tartylǵan uńǵymalardy jerasty jóndeý mashınısteri men operatoryna tólem 6-shy dáreje boıynsha júrgiziledi. Bul osyndaı jumystar úshin ádil aqy tóleýdi qamtamasyz etedi» depti.
Habarlamada ujymdyq shartqa 30% qosymsha jalaqy tóleý tártibin engizý bastamasyna qatysty jaýap qaıtarylypty:
«QR zańnamasyna jáne ÓMG-niń 2023 jylǵy eńbekaqy tóleý erejelerine sáıkes 30%-ǵa deıingi ústemaqy laýazymdardy qosa atqarǵany, qyzmet kórsetý túrlerin keńeıtkeni nemese qosymsha fýnksıalardy oryndaǵany úshin tólenedi. Sondaı-aq, ÓMG jumysshylarynyń jalaqysyna jyl saıyn ındeksasıa júrgiziledi. Bul óńirdegi basqa munaı óndirýshi kásiporyndardaǵy ortasha jalaqydan asady» delengen.
