سوڭعى ۋاقىتتارى «وزەنمۇنايگاز» اق-ى مۇنايشىلارى مەن مەكەمەدە جۇمىس ىستەپ زەينەتكە شىققان ازاماتتار (بۇرىنعى قىزمەتكەرلەر) ءبىراز تالاپتارىن قويعان بولاتىن. بۇگىن «قازمۇنايگاز» ۇك اق وسى ماسەلەگە بايلانىستى مالىمدەمە جاسادى، – دەپ حابارلايدى Dalanews.kz.
«قازمۇنايگاز» كوماپنياسىنىڭ تەلەگرام ارناسىنا جاريالانعان حابارلامادا ومگ زەينەتكەرلەرىنىڭ (بۇرىنعى قىزمەتكەرلەرىنىڭ) بالالارى كومپانيانىڭ شتاتىنا تىكەلەي الىنسا، 2020 جىلى بەكىتىلگەن جۇمىسقا ورنالاسۋ الگوريتمىن بۇزالاتىنىن العا تارتقان. سونىمەن قاتار حابارلامادا «الگوريتمگە سايكەس ومگ زەينەتكەرلەرىنىڭ بالالارى مەن جۇمىسسىز ازاماتتار 50/50 پروپورسياسى بويىنشا تەڭ دارەجەدە جۇمىسقا قابىلدانادى. بۇل تالاپتى ورىنداۋ مۇمكىن ەمەس، ويتكەنى جۇمىسقا ورنالاسۋ كەزەگىن كۇتىپ وتىرعان جاڭاوزەن قالاسىنىڭ باسقا جۇمىسسىز تۇرعىندارىنىڭ قۇقىعىن بۇزادى» دەلىنگەن.
بۇدان باسقا حابارلامادا زەينەتكە ەرتە شىققاندا تولەم مولشەرىن 300 اەك ۇلعايتۋ ماسەلەسىنە قاتىستى دا جاۋاپ قايتارىلىپتى. «ومگ-دە جۇمىسشىلارعا مەرزىمىنەن بۇرىن زەينەتكە شىعۋعا مۇمكىندىك بەرەتىن ارنايى باعدارلاما بار. زەينەت جاسىنا جاقىنداعان قىزمەتكەرلەرگە ارنالعان باعدارلامانىڭ تالاپتارى ايلىق ەسەپتىك كورسەتكىشكە (اەك)، مۇنايشىنىڭ ءوتىلى مەن جاسىنا بايلانىستى، سونىمەن قاتار وتباسى مۇشەسىن جۇمىسقا ورنالاستىرۋ مۇمكىندىگى دە قاراستىرىلعان.
تولەم مولشەرى جۇمىسشىنىڭ وتىلىنە جانە زەينەتكە شىعۋعا دەيىن قالعان ايلار سانىنا بايلانىستى اەك نەگىزىندە ەسەپتەلەدى. بۇل رەتتە، تولەماقىنىڭ ەڭ جوعارى مولشەرى 125 اەك – 40 جىلدان استام ەڭبەك ءوتىلى بار قىزمەتكەرلەر ءۇشىن بەلگىلەنگەن.
مىسالى، ومگ-دە 40 جىلدان استام جۇمىس ىستەگەن قىزمەتكەر بۇگىندە 60 جاسقا كەلىپ ەرتە زەينەتكە شىقسا، 16،6 ملن تەڭگە الادى» دەلەنىگەن حابارلامادا.
جۇمىسشىلار كاسىپوداعى قويىپ وتىرعان تالاپ – اەك مولشەرىن 125-تەن 300 اەك-كە دەيىن ۇلعايتۋ، بۇل تولەم مولشەرىن ەكى ەسەدەن استامعا ارتتىراتىنى بەلگىلى. الايدا كومپانيا مۇنايشىلارعا ءقازىردىڭ وزىندە جاقسى جاعداي جاسالعانىن، ءبىر قىزمەتكەرگە كورسەتىلەتىن الەۋمەتتىك قولداۋ مولشەرى – ەڭ جوعارى كورسەتكىشكە سايكەس كەلەتىنىن العا تارتىپتى.
بۇدان باسقا ۇڭعىمالارعا قىزمەت كورسەتۋ باسقارماسى جانىنان 1000 ورىندىق ارنايى تەحنيكانى جوندەيتىن بازا سالۋ ىسىنە قاتىستى دا «قازمۇنايگاز» اق ءوز ۇستانىمىن اشىق ءبىلدىرىپتى.
«ومگ جىل سايىن ارنايى تەحنيكانى جاڭارتىپ وتىرادى. قازىرگى ۋاقىتتا بۇرعىلاۋ جۇمىستارى باسقارماسىنىڭ تەحنيكاسىن قوسا العاندا، اۆتوپاركتىڭ 65% جاڭارتىلدى. 2022-2024 جىلدار ارالىعىندا بۇعان 22 ملرد تەڭگەدەن اسا قارجى جۇمسالدى، ال 2029 جىلعا دەيىن تاعى 53 ملرد تەڭگەدەن استام بولىنەتىن بولادى. تەحنيكانى جاڭارتۋدىڭ ناتيجەسىندە جوندەۋ جۇمىستارى ازايدى، سوندىقتان جۇمىسشىلار تالاپ ەتكەندەي جاڭا جوندەۋ بازاسىن سالۋ ءتيىمسىز بولىپ وتىر. ارنايى تەحنيكانى جاڭارتۋ جۇمىستارى قمگ توبىنىڭ بارلىق كومپانياسىندا جۇرگىزىلىپ جاتىر» دەپ «قازمۇنايگاز» بۇعان دا ناقتى جاۋاپ قايتارىپتى.
سونداي-اق، مۇنايشىلار كوتەرگەن ۇجىمدىق شارتتىڭ 2013 جىلعى رەداكسياسىن قايتارۋ جانە دەربەس ەڭبەكاقى تولەۋ جۇيەسىنە ءوتۋ ماسەلەسىنە قاتىستى تومەندەگىدەي جاۋاپ قايتارىلعان.
«كاسىپوداق 2013 جىلى قولدانىستا بولعان ومگ ۇجىمدىق شارتىنىڭ 5.19 تارماعىن قايتارۋدى ۇسىنادى. بۇل تارماق بويىنشا جەكە تابىس سالىعى مەن مىندەتتى زەينەتاقى جارنالارى جۇمىس بەرۋشىنىڭ ەسەبىنەن تولەنىپ كەلگەن. ال 2017 جىلدان بەرى قىزمەتكەرلەرگە جالاقى سالىق ۇستالعاننان كەيىن بەرىلەدى، بۇل ق ر زاڭناماسىنا تولىعىمەن سايكەس كەلەدى.
2024 جىلدىڭ شىلدەسىندە وزەنمۇنايگاز كومپانياسىندا ەڭبەكاقى تولەۋدىڭ جاڭا جۇيەسىنە ءوتۋ جۇمىستارى باستالدى. كاسىپوداقتار مەن ق ر ەڭبەك مينيسترلىگىنىڭ قاتىسۋىمەن كۇردەلى جۇمىستى ءادىل باعالاۋعا نەگىزدەلگەن ەرەجەلەر ازىرلەندى. قازىرگى ۋاقىتتا ومگ ىشىندە ءوزارا كەلىسىمدەر ءجۇرىپ جاتىر» دەلىنگەن حابارلامادا.
ال ۇڭعىمالاردى جەراستى جانە كۇردەلى جوندەۋ ماشينيستەرى مەن وپەراتوردىڭ ساناتىن 6-7ء-شى دارەجەگە كوتەرۋ ماسەلەسىنە قاتىستى مۇنايشىلار تومەندەگىدەي جاۋاپ الدى.
«جۇمىسشىنىڭ دارەجەسى ق ر ەڭبەك مينيسترلىگىنىڭ 2018 جىلعى بۇيرىعىمەن بەكىتىلگەن ءبىرىڭعاي تاريفتىك-بىلىكتىلىك انىقتامالىعى بويىنشا بەلگىلەنەدى. ءقازىر كۇردەلى جۇمىستارعا تارتىلعان ۇڭعىمالاردى جەراستى جوندەۋ ماشينيستەرى مەن وپەراتورىنا تولەم 6-شى دارەجە بويىنشا جۇرگىزىلەدى. بۇل وسىنداي جۇمىستار ءۇشىن ءادىل اقى تولەۋدى قامتاماسىز ەتەدى» دەپتى.
حابارلامادا ۇجىمدىق شارتقا 30% قوسىمشا جالاقى تولەۋ ءتارتىبىن ەنگىزۋ باستاماسىنا قاتىستى جاۋاپ قايتارىلىپتى:
«ق ر زاڭناماسىنا جانە ومگ-نiڭ 2023 جىلعى ەڭبەكاقى تولەۋ ەرەجەلەرىنە سايكەس 30%-عا دەيىنگى ۇستەماقى لاۋازىمداردى قوسا اتقارعانى، قىزمەت كورسەتۋ تۇرلەرىن كەڭەيتكەنى نەمەسە قوسىمشا فۋنكسيالاردى ورىنداعانى ءۇشىن تولەنەدى. سونداي-اق، ومگ جۇمىسشىلارىنىڭ جالاقىسىنا جىل سايىن يندەكساسيا جۇرگىزىلەدى. بۇل وڭىردەگى باسقا مۇناي ءوندىرۋشى كاسىپورىندارداعى ورتاشا جالاقىدان اسادى» دەلەنگەن.
