Resei Ýkrainadaǵy soǵysqa qatysty kelissózderdi bastaý úshin qazirgi maidan shebinde toqtaýǵa daiyn emes. Bul týraly Resei syrtqy ister ministri Sergei Lavrov málimdedi, dep habarlaidy dalanews.kz.
Bloomberg málimetinshe, Lavrov Máskeý úshin áskeri operatsiia barysyndaǵy qazirgi shep kelissózderge negiz bola almaitynyn aitqan. Onyń sózinshe, Resei 2022 jylǵy Stambul formatyndaǵy kelissózder men keiingi usynystardy talqylaýǵa daiyn, alaida óz ustanymynan bas tartpaidy.
Reuters agenttiginiń habarlaýynsha, Máskeý Ýkrainadaǵy soǵysty retteý boiynsha dialogqa ashyq ekenin málimdegenimen, Resei baqylaýyndaǵy aýmaqtar máselesinde burynǵy talaptaryn saqtap otyr. Resei tarapy Donbassqa qatysty talaptaryn ózgertpegenin jetkizdi.
Óz kezeginde Ýkraina prezidenti Vladimir Zelenskii Reseige qysymdy kúsheitý qajet ekenin aityp, Kiev eshqandai aýmaqtyq jeńildikke barmaitynyn birneshe ret málimdedi. Eýropalyq odaq elderi men G7 memleketteri de Ýkrainaǵa qoldaýdy jalǵastyrýǵa nietti ekenin rastady.
Sarapshylardyń pikirinshe, Lavrovtyń málimdemesi Máskeýdiń maidandaǵy jaǵdai ózgermei turyp, bitimge kelýge asyqpaitynyn kórsetedi. Sondyqtan jaqyn arada Resei men Ýkraina arasyndaǵy kelissózderde aitarlyqtai serpilis bolýy ekitalai.
