Belgili zańger Aigúl Orynbek elimizde jappai ashylyp jatqan qaiyrymdylyq qorlary jaily sóz qozǵady. Aitýynsha, olardyń basym bóligi halyqty óz múddelerine paidalanýdy kózdeidi, dep habarlaidy Dalanews.kz.
“Qandy qańtar oqiǵasynan keiin el aldynda júrgen qor ashqyshtardy tekserýdi suraǵan edim. Bálkim, olar “qairymdylyq úshin” dep, qorǵa jinalǵan aqshaǵa terroristerdi qarjylandyryp otyrǵan shyǵar. Qorlardyń kóbeiip ketkeni sonsha, muny kásip kózine ainaldyryp alǵandar da bar. Ańqaý ári ańǵal halyq piramidaǵa aldaǵandary azdai, endi qorlarǵa jem bolyp jatyr. Jalpy halyqtyń ózine daýa joq”, - deidi ol.
Zańger halyqty senimdi qaiyrymdylyq qorlaryna júginýge shaqyrdy.
“Prezidentimiz Qasym-Jomart Kemeluly “Qazaq halqyna” qoryn ashty. Eger memleketke janyńyz ashyp, qairymdylyq jasaǵyńyz kelse, árbir tiyny baqylaýda turǵan qorǵa salý oryndy. Ókinishke qarai, Prezidentimizdiń tapsyrmasyn oryndamai, sabotaj jasaǵyshtar qorlardy kóbeitip jiberdi. Tipti, ákimdik ishinen qor ashyp alǵan ákimder de bar. Bulardyń bárin elimizdiń Ulttyq qaýipsizdik komiteti tekserýi kerek”, - dedi ol.
Osylai dep dabyl qaqqan zańger QR Bas prokýratýrasy men QR Ulttyq qaýipsizdik komitetinen jaǵdaidy qatań baqylaýǵa alýyn surady.
“Kóshede múgedek balanyń sýretin ustap, alaqan jaiǵan jasóspirimderdiń áreketine toqtaý salý qajet. Perizattyń Palestinaǵa kómek berip júrgenin kórip, osy qyz alaiaqtyǵy bar jat aǵymdaǵy aǵalarynyń qolyna túsip qalǵan joq pa eken degen oida qalǵan edim. Sońǵy shyqqan aqparat bizdiń eldegi qorlardy qatań baqylaýǵa alyp, qorlarǵa qatysty tiisti zań shyǵarý kerek ekenin aiqyn kórsetip berdi. Shet elden qarjylandyrylatyn qorlardy da tekserýdi suraimyn”, - dep qosty ol.
Eske salaiyq, kúni keshe QMA eriktiler qozǵalysynyń belsendisi jáne BizBirgemizQazaqstan qoǵamdyq qaiyrymdylyq qorynyń quryltaishysy Perizat Qairatqa qatysty tergeý júrgizilip jatqany belgili bolǵan edi.
Ol kóktemgi sý tasqynynan zardap shekken azamattarǵa kómektesý úshin jinalǵan 1,5 mlrd teńgeden astam qarajatty jymqyrdy dep kúdikke ilindi.
Qaiyrymdylyqtyń negizgi bóligi qymbat sán buiymdary men jyljymaityn múlikti satyp alý maqsatyna paidalanyldy.
Biyl kóktemde ol elordadaǵy avtosalondarda 88 mln teńgege "Mercedes-Benz S450", 80 mln teńgege "Lexus LX-600" jáne 39 mln teńgege "Haval" avtokólikterin satyp aldy.
Osy kezeńde ol jalpy somasy 600 mln teńgeni quraityn elordanyń premiým sanattaǵy "Akbulak Riviera", "Highvill Ishim Gold", "Kók Jailaý" TK (turaq oryndaryn qosa alǵanda), sondai-aq "Vela Village" kottedj qalashyǵynda jyljymaityn múlik nysandaryn satyp aldy.
Sonymen qatar, qazaqstandyqtardyń qaiyrymdylyqqa jibergen qarajat esebinen Perizat Q. Dýbai, Doha, London jáne Stambýldaǵy «St. Regis», «Shangri-La», «Palazzo Versace» jáne «Kempinski» siiaqty bes juldyzdy qonaq úilerde demalǵan.
Bul elderde ol "Cartier" jáne "Louis Vuitton" siiaqty brendterdiń qymbat aksessýarlary men zergerlik buiymdardy satyp alyp, feshenebeldi meiramhanalarǵa baryp, iahtalardy jaldaǵan.
Qylmystyq shemany júzege asyrý úshin dostary men týystaryna 8% syiaqy berip, qordyń aqshasy qolma-qol aqshaǵa ainaldyryp otyrǵan.
Osylaisha, Perizat Q. óziniń zańsyz áreketterimen eriktiler qozǵalysynyń bedeline nuqsan keltirip, onyń ashyqtyq pen adaldyq printsipterine kúmán keltirdi jáne halyqtyń senip tapsyrǵan qarajatyn talan-tarajǵa salǵan.
