بەلگىلى زاڭگەر ايگۇل ورىنبەك ەلىمىزدە جاپپاي اشىلىپ جاتقان قايىرىمدىلىق قورلارى جايلى ءسوز قوزعادى. ايتۋىنشا، ولاردىڭ باسىم بولىگى حالىقتى ءوز مۇددەلەرىنە پايدالانۋدى كوزدەيدى، دەپ حابارلايدى Dalanews.kz.
“قاندى قاڭتار وقيعاسىنان كەيىن ەل الدىندا جۇرگەن قور اشقىشتاردى تەكسەرۋدى سۇراعان ەدىم. بالكىم، ولار “قايرىمدىلىق ءۇشىن” دەپ، قورعا جينالعان اقشاعا تەرروريستەردى قارجىلاندىرىپ وتىرعان شىعار. قورلاردىڭ كوبەيىپ كەتكەنى سونشا، مۇنى كاسىپ كوزىنە اينالدىرىپ العاندار دا بار. اڭقاۋ ءارى اڭعال حالىق پيراميداعا الداعاندارى ازداي، ەندى قورلارعا جەم بولىپ جاتىر. جالپى حالىقتىڭ وزىنە داۋا جوق”، - دەيدى ول.
زاڭگەر حالىقتى سەنىمدى قايىرىمدىلىق قورلارىنا جۇگىنۋگە شاقىردى.
“پرەزيدەنتىمىز قاسىم-جومارت كەمەل ۇلى “قازاق حالقىنا” قورىن اشتى. ەگەر مەملەكەتكە جانىڭىز اشىپ، قايرىمدىلىق جاساعىڭىز كەلسە، ءاربىر تيىنى باقىلاۋدا تۇرعان قورعا سالۋ ورىندى. وكىنىشكە قاراي، پرەزيدەنتىمىزدىڭ تاپسىرماسىن ورىنداماي، سابوتاج جاساعىشتار قورلاردى كوبەيتىپ جىبەردى. ءتىپتى، اكىمدىك ىشىنەن قور اشىپ العان اكىمدەر دە بار. بۇلاردىڭ ءبارىن ەلىمىزدىڭ ۇلتتىق قاۋىپسىزدىك كوميتەتى تەكسەرۋى كەرەك”، - دەدى ول.
وسىلاي دەپ دابىل قاققان زاڭگەر ق ر باس پروكۋراتۋراسى مەن ق ر ۇلتتىق قاۋىپسىزدىك كوميتەتىنەن جاعدايدى قاتاڭ باقىلاۋعا الۋىن سۇرادى.
“كوشەدە مۇگەدەك بالانىڭ سۋرەتىن ۇستاپ، الاقان جايعان جاسوسپىرىمدەردىڭ ارەكەتىنە توقتاۋ سالۋ قاجەت. پەريزاتتىڭ پالەستيناعا كومەك بەرىپ جۇرگەنىن كورىپ، وسى قىز الاياقتىعى بار جات اعىمداعى اعالارىنىڭ قولىنا ءتۇسىپ قالعان جوق پا ەكەن دەگەن ويدا قالعان ەدىم. سوڭعى شىققان اقپارات ءبىزدىڭ ەلدەگى قورلاردى قاتاڭ باقىلاۋعا الىپ، قورلارعا قاتىستى ءتيىستى زاڭ شىعارۋ كەرەك ەكەنىن ايقىن كورسەتىپ بەردى. شەت ەلدەن قارجىلاندىرىلاتىن قورلاردى دا تەكسەرۋدى سۇرايمىن”، - دەپ قوستى ول.
ەسكە سالايىق، كۇنى كەشە قما ەرىكتىلەر قوزعالىسىنىڭ بەلسەندىسى جانە BizBirgemizQazaqstan قوعامدىق قايىرىمدىلىق قورىنىڭ قۇرىلتايشىسى پەريزات قايراتقا قاتىستى تەرگەۋ جۇرگىزىلىپ جاتقانى بەلگىلى بولعان ەدى.
ول كوكتەمگى سۋ تاسقىنىنان زارداپ شەككەن ازاماتتارعا كومەكتەسۋ ءۇشىن جينالعان 1،5 ملرد تەڭگەدەن استام قاراجاتتى جىمقىردى دەپ كۇدىككە ءىلىندى.
قايىرىمدىلىقتىڭ نەگىزگى بولىگى قىمبات ءسان بۇيىمدارى مەن جىلجىمايتىن مۇلىكتى ساتىپ الۋ ماقساتىنا پايدالانىلدى.
بيىل كوكتەمدە ول ەلورداداعى اۆتوسالونداردا 88 ملن تەڭگەگە "Mercedes-Benz S450"، 80 ملن تەڭگەگە "Lexus LX-600" جانە 39 ملن تەڭگەگە "Haval" اۆتوكولىكتەرىن ساتىپ الدى.
وسى كەزەڭدە ول جالپى سوماسى 600 ملن تەڭگەنى قۇرايتىن ەلوردانىڭ پرەميۋم ساناتتاعى "Akbulak Riviera"، "Highvill Ishim Gold"، "كوك جايلاۋ" تك (تۇراق ورىندارىن قوسا العاندا)، سونداي-اق "Vela Village" كوتتەدج قالاشىعىندا جىلجىمايتىن مۇلىك نىساندارىن ساتىپ الدى.
سونىمەن قاتار، قازاقستاندىقتاردىڭ قايىرىمدىلىققا جىبەرگەن قاراجات ەسەبىنەن پەريزات ق. دۋباي، دوحا، لوندون جانە ستامبۋلداعى «St. Regis»، «Shangri-La»، «Palazzo Versace» جانە «Kempinski» سياقتى بەس جۇلدىزدى قوناق ۇيلەردە دەمالعان.
بۇل ەلدەردە ول "Cartier" جانە "Louis Vuitton" سياقتى برەندتەردىڭ قىمبات اكسەسسۋارلارى مەن زەرگەرلىك بۇيىمداردى ساتىپ الىپ، فەشەنەبەلدى مەيرامحانالارعا بارىپ، ياحتالاردى جالداعان.
قىلمىستىق سحەمانى جۇزەگە اسىرۋ ءۇشىن دوستارى مەن تۋىستارىنا 8% سىياقى بەرىپ، قوردىڭ اقشاسى قولما-قول اقشاعا اينالدىرىپ وتىرعان.
وسىلايشا، پەريزات ق. ءوزىنىڭ زاڭسىز ارەكەتتەرىمەن ەرىكتىلەر قوزعالىسىنىڭ بەدەلىنە نۇقسان كەلتىرىپ، ونىڭ اشىقتىق پەن ادالدىق پرينسيپتەرىنە كۇمان كەلتىردى جانە حالىقتىڭ سەنىپ تاپسىرعان قاراجاتىن تالان-تاراجعا سالعان.
