"Bul mekteptiń basshysy – Aıatjan Ahmetjan. Ol kináni birese mınıstrlikke, birese qarjy ortalyǵyna aýdaryp júr. Biraq ata-anadan aqshany kim jınady? Muǵalimmen kelisimshartty kim jasady? Búkil ujym aılap aqshasyz otyrǵanda, basshylyq "men kináli emespin" dep jaıbaraqat otyra ma? Oqý ornynyń basshysy muǵalimniń jalaqysyn tóleýdiń ornyna, "sottasamyn" dep ustazdardy qorqytatyn kórinedi", - dep jazylǵan basylym málimetinde.

Shymkent qalasynyń Qazbilim ortalyǵynyń muǵalimideri ashynyp otyr. Olar "Aıatjan Ahmetjan jalaqymyzdy tólemegenimen qoımaı, óziniń qandaı basshy ekenin kórsetti" deıdi. Muǵalimder eńbekaqysyn ala almaı, ár esikti bir qaǵyp júr. 

Bul jaǵdaı týraly jeli qoldanýshysy Jasulan Jaqypov bylaı dep jazdy: "Qazir nesıesiz júrgen adam bar ma ózi? Ásirese, jas otbasylar úshin ómir súrý shyn máninde ońaı bolmaı tur. Páter aqysy, júrip-turý, azyq-túlik, jaryq pen sý, balanyń kıimi men mektebi, nesıesi bar… Aı saıyn bári jınalyp, bir jalaqyǵa qarap otyratyn jaǵdaıǵa jettik.

Endi kóz aldyńyzǵa elestetińizshi: siz úsh aı jumys istep, biraq eńbekaqyńyzdy ala almaı júrsiz. Basshylyqqa aıtasyz, "kútińiz" deıdi. Esep-qısap, jospar joq. Sonda siz ne isteýińiz kerek? Úıdegi shyǵyndy qalaı jappaqsyz? Balańyzdyń kıimin she, tamaǵyn she?

Mundaı jaǵdaıda úndemeı júre berý – qıynnyń qıyny. Biraq kóp muǵalim úndeıdi dep oılaısyz ba? Joq. Olar áli de úmitin úzbeı otyr. Al ún qatqandar – shydamy taýsylǵandar. Olar da adam. Olar da kún kórgisi keledi. Taǵy bir baıqaǵanym: keı kásipkerler "ultym" dep sóz bastap, upaı jınaýǵa tyrysady. Biraq shyn janashyrlyqty tek sózben emes, ispen kórsetetin ýaqyt keldi. Bul – ról oınaıtyn emes, adal bolýdy talap etetin kezeń. Úsh aı aılyq almaı kórmeıinshe, bireýdiń janaıqaıyn túsiný qıyn. Sondyqtan únsiz qalmaıyq. Jaǵdaıy nashardy túsinip, ádildik jaǵynda bolaıyq…"

Onyń jazýynsha, Qazbilim ortalyǵynyń keıbir muǵalimderi áleýmettik jelide ashyq sóıleı almaıdy eken. Sebebi jumysqa qabyldanar kezde "teris pikir jazýǵa bolmaıdy" degen pýnkti bar kelisimshartqa qol qoıdyryp alatyn kórinedi. "Bul degenimiz Memleketke, Prezıdentke degen, elimizdiń muǵalimderine qarsy jumys jasaý dep bilemiz" deıdi.

Sondaı-aq, J.Jaqypov Qazbilim ortalyǵy basshysynyń sotpen qorqytyp otyrǵanyn da habarlady.

"Aıatjan Ahmetjanuly endi men úshin ultshyl ustaz emes. Meniń kózim jetti: bul azamat memlekettiń qarjysyn alyp, jeke paıdasyn kúıttep otyrǵan kásipker ǵana. Ustazdarǵa jany ashıtyn adam emes, bedeline syn kelse, ashýǵa býlyǵyp, jeke basyma ýgroza jasaýdan taıynbaıtyn tulǵa…

Menimen sottasqysy keletinin aıtyp, jeke hatpen qorqytyp jatyr. Myna skrınshottaǵy jazbasy – sonyń aıǵaǵy. Ashyq dıalogtan qashyp, jeke hatqa jasyrynyp, qysym kórsetýge kóshti", – dep jazdy ol.

Áleýmettik jelide J.Jaqypovty qoldap jazyp jatqandar az emes eken. Olardyń arasynda ortalyqtyń muǵalimderi de bar. Al J.Jaqypov "ýgroza jasady" degen Qazbilim ortalyǵynyń jetekshisi A.Ahmetjan: "Mindetti túrde sotta kezdesemiz! Qorqytý emes, azamattyq eskertý! Quqyqtyq memlekettiń azamattarymyz, bári zań júzinde sheshiledi!" – degen jazba qaldyrypty...