«Ońtústik» aımaǵynan (Shymkent, Jambyl, Qyzylorda jáne Túrkistan oblystary) 38 shahmatshy «Senat Open» II Ashyq kýbogynyń fınalyna joldama aldy,- dep habarlaıdy Dalanews.kz
2025 jylǵy 25 maýsymda Túrkistan qalasynda týrnırdiń bes jartylaı fınalynyń alǵashqysy aıaqtaldy. Jarysqa 129 úzdik oıynshy qatysty: Shymkentten – 29, Jambyl oblysynan – 32, Qyzylorda oblysynan – 34 jáne Túrkistan oblysynan – 34 qatysýshy. Týrnır jeńimpazy – Qyzylorda oblysynan 68 jastaǵy Iýrıı Egaı boldy. Ol jalpy 9 upaıdyń 8-in jınady. Ekinshi oryndy 7,5 upaımen Túrkistan oblysynan 41 jastaǵy Serik Qydyrbaev ıelendi. Úshinshi oryndy 7,5 upaımen Qyzylorda oblysynan 75 jastaǵy Barat Jetpisbaev aldy. Qydyrbaev Býhgols koefısıenti boıynsha Jetpisbaevtan ozyp ketti. Taǵy jeti oıynshy 7 upaıdan jınady.
Týrnır saltanatty ashylý rásiminen bastaldy. Túrkistan oblystyq máslıhatynyń tóraǵasy Nuraly Ábishov pen Qyzylorda oblystyq máslıhatynyń tóraǵasy Murat Tleýmbetov shahmat sportynyń damýyna qosqan úlesi úshin KazChess uıymynyń «II dárejeli úzdik belgisimen» marapattaldy. Osydan keıin oıyn bastaldy.
Tórtinshi týrdan keıin alty oıynshynyń esebinde tórt jeńisten boldy. Besinshi týrda kósh basynda eki oıynshy qaldy: Túrkistan oblysynan Serik Qydyrbaev pen Shymkentten Asylbek Túıetaev. Altynshy týrda Qyzylorda oblysynan Edýard Pak pen Iýrıı Egaı olarǵa teńesti. Jetinshi týrdan keıin Egaı men Qydyrbaev 6,5 upaımen alǵa shyqty. Olardy 6 upaımen Tlektes Taıqara, Barat Jetpisbaev jáne Sapar Tájıdınov qýyp jetip kele jatty. Sońǵy týrda Egaı Jetpisbaevpen teń oınap, kóshbasshylyqty saqtap qaldy. Qydyrbaev Jambyl oblysynan Jánibek Qoǵabaevty jeńdi. Taıǵara men Túıetaev ózara teń tústi.
Jeke birinshilikpen qatar, kelesi alty nomınasıa boıynsha marapattar tabystaldy:
- Ardagerler: Iýrıı Egaı, Qyzylorda oblysy, 1-shi oryn;
- Áıelder: Gúlzaıa Qurmanbaeva, Qyzylorda oblysy, 81-shi oryn;
- Depýtattar men máslıhat qyzmetkerleri: Júnisbek Serikov, Jambyl oblysy, 29-shy oryn;
- Memlekettik qyzmetshiler: Sapar Tájıdınov, Shymkent, 6-shy oryn;
- Qoǵamdyq keńes músheleri: Serik Qydyrbaev, Túrkistan oblysy, 5-shi oryn;
- BAQ ókilderi: Asylbek Túıetaev, Shymkent, 4-shi oryn.
«Ońtústik» aımaǵynan fınalǵa 38 shahmatshy joldama aldy: Túrkistan oblysynan – 13, Shymkentten – 10, Jambyl oblysynan – 8, Qyzylorda oblysynan – 7.
«Senat Open» týrnıri alǵash ret ótken jyly uıymdastyrylyp, 2000-nan astam shahmat áýesqoıyn jınaǵan bolatyn. Bul týrnır ıdeıasynyń avtory – Qazaqstan Respýblıkasy Parlamenti Senatynyń tóraǵasy Máýlen Áshimbaev, al ony Qazaqstan shahmat federasıasynyń prezıdenti Tımýr Týrlov qoldady.
2025 jyly týrnır ekinshi ret ótýde. Júıe ózgergen joq: 20 irikteý kezeńi – 21 aqpannan 27 mamyrǵa deıin, 5 jartylaı fınal – 25 maýsym men 9 tamyz aralyǵynda.
Fınal – 29 tamyz kúni Astana qalasynda ótedi.
«Senat Open» týrnırine 2025 jylǵy 1 qańtardaǵy reıtıńi 2000-nan tómen shahmatshylar ǵana qatysa alady. Jarys shveısar júıesi boıynsha 9 týrdan turady, ýaqytty baqylaý 10 mınýt + ár júriske 5 sekýnd formatynda ótedi.
İrikteý týrlaryna 2100-den astam adam qatysqan. Ardagerler arasyndaǵy jarystardy qosa eseptegende, qatysýshylardyń jalpy sany 3000 adamnan asty.
Túrkistanda ótken «Senat Open» týrnıriniń alǵashqy jartylaı fınaly básekelestiktiń joǵary deńgeıin kórsetti. Bul týrnır Qazaqstandaǵy shahmattyń tanymaldyǵyn arttyryp, myńdaǵan áýesqoılardy biriktirip otyr.
