«وڭتۇستىك» ايماعىنان (شىمكەنت، جامبىل، قىزىلوردا جانە تۇركىستان وبلىستارى) 38 شاحماتشى «Senat Open» II اشىق كۋبوگىنىڭ فينالىنا جولداما الدى،- دەپ حابارلايدى Dalanews.kz
2025 جىلعى 25 ماۋسىمدا تۇركىستان قالاسىندا ءتۋرنيردىڭ بەس جارتىلاي فينالىنىڭ العاشقىسى اياقتالدى. جارىسقا 129 ۇزدىك ويىنشى قاتىستى: شىمكەنتتەن – 29، جامبىل وبلىسىنان – 32، قىزىلوردا وبلىسىنان – 34 جانە تۇركىستان وبلىسىنان – 34 قاتىسۋشى. تۋرنير جەڭىمپازى – قىزىلوردا وبلىسىنان 68 جاستاعى يۋريي ەگاي بولدى. ول جالپى 9 ۇپايدىڭ 8ء-ىن جينادى. ەكىنشى ورىندى 7،5 ۇپايمەن تۇركىستان وبلىسىنان 41 جاستاعى سەرىك قىدىربايەۆ يەلەندى. ءۇشىنشى ورىندى 7،5 ۇپايمەن قىزىلوردا وبلىسىنان 75 جاستاعى بارات جەتپىسبايەۆ الدى. قىدىربايەۆ بۋحگولس كوەففيسيەنتى بويىنشا جەتپىسبايەۆتان وزىپ كەتتى. تاعى جەتى ويىنشى 7 ۇپايدان جينادى.
تۋرنير سالتاناتتى اشىلۋ راسىمىنەن باستالدى. تۇركىستان وبلىستىق ءماسليحاتىنىڭ ءتوراعاسى نۇرالى ءابىشوۆ پەن قىزىلوردا وبلىستىق ءماسليحاتىنىڭ ءتوراعاسى مۇرات تلەۋمبەتوۆ شاحمات سپورتىنىڭ دامۋىنا قوسقان ۇلەسى ءۇشىن KazChess ۇيىمىنىڭ «II دارەجەلى ۇزدىك بەلگىسىمەن» ماراپاتتالدى. وسىدان كەيىن ويىن باستالدى.
ءتورتىنشى تۋردان كەيىن التى ويىنشىنىڭ ەسەبىندە ءتورت جەڭىستەن بولدى. بەسىنشى تۋردا كوش باسىندا ەكى ويىنشى قالدى: تۇركىستان وبلىسىنان سەرىك قىدىربايەۆ پەن شىمكەنتتەن اسىلبەك تۇيەتايەۆ. التىنشى تۋردا قىزىلوردا وبلىسىنان ەدۋارد پاك پەن يۋريي ەگاي ولارعا تەڭەستى. جەتىنشى تۋردان كەيىن ەگاي مەن قىدىربايەۆ 6،5 ۇپايمەن العا شىقتى. ولاردى 6 ۇپايمەن تلەكتەس تايقارا، بارات جەتپىسبايەۆ جانە ساپار ءتاجيدينوۆ قۋىپ جەتىپ كەلە جاتتى. سوڭعى تۋردا ەگاي جەتپىسبايەۆپەن تەڭ ويناپ، كوشباسشىلىقتى ساقتاپ قالدى. قىدىربايەۆ جامبىل وبلىسىنان جانىبەك قوعابايەۆتى جەڭدى. تايعارا مەن تۇيەتايەۆ ءوزارا تەڭ ءتۇستى.
جەكە بىرىنشىلىكپەن قاتار، كەلەسى التى نوميناسيا بويىنشا ماراپاتتار تابىستالدى:
- ارداگەرلەر: يۋريي ەگاي، قىزىلوردا وبلىسى، 1ء-شى ورىن؛
- ايەلدەر: گۇلزايا قۇرمانبايەۆا، قىزىلوردا وبلىسى، 81ء-شى ورىن؛
- دەپۋتاتتار مەن ءماسليحات قىزمەتكەرلەرى: جۇنىسبەك سەرىكوۆ، جامبىل وبلىسى، 29-شى ورىن؛
- مەملەكەتتىك قىزمەتشىلەر: ساپار ءتاجيدينوۆ، شىمكەنت، 6-شى ورىن؛
- قوعامدىق كەڭەس مۇشەلەرى: سەرىك قىدىربايەۆ، تۇركىستان وبلىسى، 5ء-شى ورىن؛
- ب ا ق وكىلدەرى: اسىلبەك تۇيەتايەۆ، شىمكەنت، 4ء-شى ورىن.
«وڭتۇستىك» ايماعىنان فينالعا 38 شاحماتشى جولداما الدى: تۇركىستان وبلىسىنان – 13، شىمكەنتتەن – 10، جامبىل وبلىسىنان – 8، قىزىلوردا وبلىسىنان – 7.
«Senat Open» ءتۋرنيرى العاش رەت وتكەن جىلى ۇيىمداستىرىلىپ، 2000-نان استام شاحمات اۋەسقويىن جيناعان بولاتىن. بۇل تۋرنير يدەياسىنىڭ اۆتورى – قازاقستان رەسپۋبليكاسى پارلامەنتى سەناتىنىڭ ءتوراعاسى ماۋلەن اشىمبايەۆ، ال ونى قازاقستان شاحمات فەدەراسياسىنىڭ پرەزيدەنتى تيمۋر تۋرلوۆ قولدادى.
2025 جىلى تۋرنير ەكىنشى رەت وتۋدە. جۇيە وزگەرگەن جوق: 20 ىرىكتەۋ كەزەڭى – 21 اقپاننان 27 مامىرعا دەيىن، 5 جارتىلاي فينال – 25 ماۋسىم مەن 9 تامىز ارالىعىندا.
فينال – 29 تامىز كۇنى استانا قالاسىندا وتەدى.
«Senat Open» تۋرنيرىنە 2025 جىلعى 1 قاڭتارداعى رەيتينگى 2000-نان تومەن شاحماتشىلار عانا قاتىسا الادى. جارىس شۆەيسار جۇيەسى بويىنشا 9 تۋردان تۇرادى، ۋاقىتتى باقىلاۋ 10 مينۋت + ءار جۇرىسكە 5 سەكۋند فورماتىندا وتەدى.
ىرىكتەۋ تۋرلارىنا 2100-دەن استام ادام قاتىسقان. ارداگەرلەر اراسىنداعى جارىستاردى قوسا ەسەپتەگەندە، قاتىسۋشىلاردىڭ جالپى سانى 3000 ادامنان استى.
تۇركىستاندا وتكەن «Senat Open» ءتۋرنيرىنىڭ العاشقى جارتىلاي فينالى باسەكەلەستىكتىڭ جوعارى دەڭگەيىن كورسەتتى. بۇل تۋرنير قازاقستانداعى شاحماتتىڭ تانىمالدىعىن ارتتىرىپ، مىڭداعان اۋەسقويلاردى بىرىكتىرىپ وتىر.
