Shyǵys Qazaqstan oblysyndaǵy Glýbokoe aýylynyń turǵyny ýákiletti organnyń radiatsiialyq qaýpi joǵary aimaqta turǵylyqty jeri týraly kýálik berýden bas tartqany úshin sotqa shaǵymdanǵan. Bas tartýǵa rastaityn qujattardyń joqtyǵy ýáj retinde kórsetilgen, dep habarlaidy Dalanews.kz.
"Semei iadrolyq synaq poligonyndaǵy iadrolyq synaqtardyń saldarynan zardap shekken azamattardy áleýmettik qorǵaý týraly" Zańyna sáikes, 1966 jyldan 1990 jylǵa deiingi jerasty iadrolyq jarylystar kezeńinde osy aýmaqtarda turǵan, jumys istegen nemese qyzmet etken (sonyń ishinde áskerge shaqyrylǵan) azamattar iadrolyq synaqtardan zardap shekkender bolyp tanylady. Olarǵa jeńildikter men ótemaqylar alý quqyǵyn rastaityn tiisti kýálikter beriledi.
Shyǵys Qazaqstan oblysynyń Glýbokoe aýdandyq soty isti qarai otyryp, talap qoiýshynyń 1990 jyldyń segiz aiynda Beloýsovka aýylynda turýy týraly jetkilikti dáleldemeler bar degen qorytyndyǵa keldi.
Bul óńir radiatsiialyq qaýpi joǵary aimaqqa jatady.
Dálel retinde myna qujattar usynyldy:
- týý týraly kýálik;
- talap qoiýshynyń anasynyń Beloýsovkada turatynyn rastaityn azamattyq hal aktileri jazbasy;
- balalar úiiniń anyqtamasy;
- talap qoiýshynyń ápkesi men aǵasynyń týylǵannan bastap balalar úiine qabyldanǵanǵa deiin atalǵan aýylda olarmen jáne ata-anasymen birge turǵany týraly aiǵaqtary.
"Sot talap qoiýdy qanaǵattandyryp, talap qoiýshynyń 1990 jyly segiz ai boiy Semei iadrolyq synaq poligonyndaǵy iadrolyq synaqtardan zardap shekken aýmaqta turý faktisin anyqtady", dep habarlaidy QR Joǵary sotynyń baspasóz qyzmeti.
Sheshim zańdy kúshine engen joq.
