Premer-mınıstr Oljas Bektenov Skyhansa kompanıasynyń negizin qalaýshy jáne dırektorlar keńesiniń múshesi, doktor Krıstın Grótsbahpen kezdesý ótkizdi. Onda Jetisý oblysyndaǵy «Qorǵas» shekara mańy yntymaqtastyǵy halyqaralyq ortalyǵy mańynda júk jáne jolaýshylar áýejaıyn salý jobasyn júzege asyrý máseleleri talqylandy, dep habarlaıdy Dalanews.kz.
«Qorǵas-SHyǵys qaqpasy» AEA-daǵy halyqaralyq júk jáne jolaýshylar áýejaıynyń jobasy ICAO halyqaralyq usynymdaryna sáıkes avıasıalyq ınfraqurylym salýdyń úsh kezeńdi baǵdarlamasyn kózdeıdi. Birinshi kezeń sheńberinde 2027 jylǵa deıin:
- ótkizý múmkindigi saǵatyna 50 adamǵa deıin jolaýshylar termınalyn (2032 jylǵa qaraı – saǵatyna 500 adamǵa deıin);
- JET A-1 avıaotyny jańa túriniń zamanaýı otyn qoımasynyń kólemi jylyna 200 myń tonnaǵa deıin (2032 jylǵa qaraı – 550 myń tonnaǵa deıin);
- avtoturaǵy jáne jylyna 50 myń tonna temirjol tuıyǵy bar júk termınalyn (2032 jylǵa qaraı – jylyna 250 myń tonnaǵa deıin) salý josparlanýda.
Ekinshi jáne úshinshi kezeńder sheńberinde 2032 jylǵa deıin týrısik jáne oıyn-saýyq ınfraqurylymy da qurylady. Investısıalardyń jalpy kólemi shamamen 250 mlrd teńgeni quraıdy.
Sondaı-aq jobada Air–Rail–Auto-Air júk tasymaldarynyń mýltımodaldy syzbasyn ázirleý jáne Azıa-Tynyq muhıty aımaǵy baǵytyndaǵy kólik jáne logıstıkalyq marshrýttardyń túıisken jerinde ekonomıkalyq ósýdiń jańa múmkindikterin ashý kózdelgen.
«Prezıdent Qasym-Jomart Toqaev Qazaqstan ekonomıkasy qurylymyn ártaraptandyrý jónindegi aýqymdy jumys sheńberinde kólik-logıstıka salasyn basym baǵyttardyń biri retinde atady. Jetisý oblysynda zamanaýı áýejaı salý jobasyn júzege asyrý ınfraqurylymdy damytýǵa eleýli serpin beredi jáne Qazaqstannyń Qytaı, Ortalyq Azıa jáne Eýropa arasyndaǵy tranzıttik hab retindegi rólin nyǵaıtady», — dep atap ótti Premer-mınıstr Oljas Bektenov.
Óz kezeginde Skyhansa kompanıasynyń negizin qalaýshy, dırektorlar keńesiniń múshesi, doktor Krıstın Grótsbah jobanyń avıasıalyq ınfraqurylymdy damytýǵa ǵana emes, sonymen qatar óńirde zamanaýı logıstıkalyq jáne iskerlik ortalyq qalyptastyrýǵa baǵyttalǵanyn atap ótti.
«Biz jaı ǵana áýejaı emes, halyqaralyq deńgeıdegi damyǵan ınfraqurylymy: júk jáne jolaýshylar termınaldary, janarmaı quıý kesheni, áýe kemelerine avıasıalyq-tehnıkalyq qyzmet kórsetý ortalyǵy (MRO), bıznes ortalyǵy, mýltımodaldy logıstıkalyq múmkindikterge arnalǵan qonaq úıleri bar kópfýnksıonaldy óńirlik hab quryp jatyrmyz. Onyń Qytaımen shekaraǵa jaqyn ornalasýy «Qorǵas – Shyǵys qaqpasy» AEA sheńberinde halyqaralyq saýdany damytýǵa qolaıly jaǵdaı jasaıdy, al onyń temirjol jáne avtojol jelilerine qosylýy jańa Jibek jolyndaǵy keleshegi zor logıstıkalyq toraptardyń birine aınaldyrady», — dep atap ótti doktor Krıstın Grótsbah.
Kezdesý sońynda QR Kólik mınıstrligi men Skyhansa arasynda Investısıalar týraly kelisimge qol qoıyldy. Qujatqa sáıkes, ınvestor qajetti avıasıalyq ınfraqurylym qurylysyn, negizinen otandyq materıaldar men qyzmetterdi paıdalanýdy, sondaı-aq jobany júzege asyrýǵa qyzmetkerlerdiń keminde 90%-y Qazaqstan azamattary bolýyn qamtamasyz etýge mindetteledi.
Qazaqstandyq tarap ınjenerlik jáne kólik ınfraqurylymyn tartyp, sondaı-aq arnaıy ekonomıkalyq aımaqqa qatysýshylarǵa maqsatty jeńildikter beredi.
Aıta ketsek, atalǵan joba Skyhansa birlesken qazaqstandyq-germandyq kásipornynyń qatysýymen júzege asyrylýda. Germanıa tarapynan seriktes retinde avıasıalyq termınaldar men ınfraqurylymdy damytý boıynsha joǵary qyzmet kórsetetin The Hansa Consortium kompanıasy, Qazaqstan tarapynan – Qazaqstan, Ortalyq Azıa jáne Kavkaz naryǵyndaǵy áýejaılar úshin keshendi qyzmetter men ınjınırıńtik sheshimder usynatyn Skymax Technologies kompanıalar toby áreket etedi.
