Búgin oblys ákimi Nurlybek Nálibaevtyń qatysýymen Aral aýdanyna qarasty Aqbasty eldi mekenine aýyz sý qosý rásimi ótti,- dep habarlaidy Dalanews.kz
Basqosýǵa Sý resýrstary jáne irrigatsiia ministri Nurjan Nurjigitov, Ulttyq mýzei direktory Berik Ábdiǵaliuly, oblystyq máslihat tóraǵasy Murat Tileýimbetov, jaýapty sala basshylary, ziialy qaýym ókilderi men aýyl turǵyndary qatysty.
Aimaq basshysy turǵyndardyń ómir sapasyn arttyrýda atqarylǵan jumystarǵa toqtalyp, quttyqtaýyn jetkizdi.
«Búgin - araldyq aǵaiyn úshin aitýly kún. Aqbasty aýylyna taza aýyz sý qosamyz.
Prezidentimiz Qasym-Jomart Kemeluly Úkimet pen oblys ákimderine memleket tarapynan jasalǵan barlyq qoldaýdy tiimdi paidalanyp, aýyl halqynyń tabysyn arttyrý, turmys-tirshiligin jaqsartý jóninde naqty tapsyrma bergen bolatyn. Ótken jyldyń qorytyndysymen oblys halqynyń 98,6 paiyzyna ortalyqtandyrylǵan aýyz sý qosyldy. Biyl 9 eldi mekenge aýyz sý tartyp, oblys turǵyndaryn ortalyqtandyrylǵan aýyz sýmen 100 paiyz qamtamasyz etemiz. Onyń ishinde, Aral aýdanyndaǵy Aqbasty, Abai, Toqabai, Erimbetjaǵa, Tastúbek eldi mekenderine 12 mlrd 700 mln. teńge bólindi.
Búgin ózderińizben birge Aqbasty aýylynyń turǵyndaryna aýyz sý qosý rásiminde bas qostyq. Joba quny 3 mlrd. 100 mln. teńge. Buǵan deiin turǵyndar aýyz sýdy jerasty qudyǵynan tasymaldap, tutynyp keldi. Endi sol qiynshylyqtardyń barlyǵy artta qaldy. Prezidentimizdiń qoldaýymen aýyz sý árbir turǵyn úige jetkizildi.
Aýyl turǵyndaryn ortalyqtandyrylǵan aýyz sýdyń qosylýymen quttyqtaimyn!», - dedi N. Nálibaev.
Rásimde Nurjan Nurjigitov pen Berik Ábdiǵaliuly kópten kútken igiliktiń iske asýymen quttyqtap, qoǵam qairatkeri, Imamadin Ońǵarbaev batasyn berdi. Aýdannyń damýyna eleýli úles qosqan azamattar men aýyz sý tartý jumystaryn sapaly ári merziminde júrgizgen merdiger mekeme qyzmetkerleri oblys ákiminiń Alǵys hatymen marapattaldy.
Aita keteiik, Aral aýdanynda barlyq salanyń damý qarqyny jyl saiyn artyp keledi. Eki jyl buryn aýdan biýdjeti 10,1 mlrd teńge bolsa, búginde 22 mlrd teńgeden asty. Sońǵy úsh jylda 80 mlrd teńgege jýyq investitsiia tartyldy.
Aýdan halqynyń 71 paiyzy "kógildir otynnyń" igiligin kórýde. Araldyń Syr betkeiindegi eldi mekenderdi gazdandyrý úshin Qamystybas eldi mekeninen avtomattandyrylǵan gaz taratý stantsiiasynyń qurylysy bastaldy. «Jaily mektep» ulttyq jobasy aiasyndaǵy 10 mekteptiń 2-ýi Aral aýdanynda salyndy. Jańa oqý jylynda Sekseýil kentindegi «Jaily mektep» paidalanýǵa beriledi.
«Aýylda densaýlyq saqtaýdy jańǵyrtý» ulttyq jobasy aiasynda 3 ambýlatoriia iske qosyldy. Atalǵan joba aiasynda Aral kópbeiindi aýdandyq aýrýhanasynyń qosymsha ǵimaraty men juqpaly aýrýlar bólimshesiniń qurylysy bastaldy. Oblystyq biýdjet qarjysyna Sekseýil kentinen 40 tósektik aýrýhana salynyp, emdelýshilerge qyzmet kórsetýde.
Ótken aida araldyqtar kópten kútken aspaly kópir el igiligine tabystaldy.
Eldi mekendi aýyz sýǵa qosý rásiminen keiin aimaq basshysy turǵyndarmen kezdesti. Áleýmettik-ekonomikalyq damýdyń baǵyt-baǵdary, infraqurylymdyq jobalardyń júzege asý barysy týraly aityp, oi-pikirlerdi tyńdady.
