Jezqazǵanda óńirdiń basty mádeni nysandarynyń biri – Serke Qojamqulov atyndaǵy oblystyq qazaq mýzykalyq-drama teatryn aýqymdy jańǵyrtý jumysy júrgizilýde. Jobany «Qazaqmys korporatsiiasy» JShS júzege asyrýda. Teatr 1972 jyly paidalanýǵa berilgen. Bul sodan beri júrgizilip jatqan alǵashqy tolyqqandy kúrdeli jańǵyrtý, dep habarlaidy dalanews.kz.
Joba ǵimarattyń tarihi sáýlettik kelbetin saqtai otyryp, ony keshendi túrde jańǵyrtýdy kózdeidi. Jobanyń basty maqsaty – Ulytaý oblysynda teatr óneriniń damýyna jańa múmkindik beretin zamanaýi mádeni keńistik qalyptastyrý.
Jańǵyrtý jumysy aiaqtalǵannan keiin teatr zamanaýi sahnalyq, jaryq jáne dybys jabdyqtarymen qamtamasyz etiledi. Negizgi jańalyqtyń biri – ainalmaly mehanizmi bar jańa sahnanyń ornatylýy. Bul sheshim qoiylym qoiý múmkindigin aitarlyqtai keńeitip, spektaklder men mádeni is-sharalardy ótkizý sapasyn jańa deńgeige kóteredi.
Jańǵyrtý aiasynda nysannyń injenerlik infraqurylymy tolyq jańartylady. Jylýmen, sýmen jáne elektrmen jabdyqtaý júielerin aýystyrý, zamanaýi órt qaýipsizdigi men beinebaqylaý júielerin montajdaý, sondai-aq jańa jeldetý jáne aýa baptaý júielerin ornatý kózdelgen. Budan bólek shatyr jabyny tolyq aýystyrylyp, teatrdyń ishki bólmeleri túgel jańartylady.
Búginde demontaj jumysy tolyq aiaqtaldy. Teatr ǵimaratynda ishki árleý jumystary jalǵasyp, qurylys-montajdaý jumysynyń kelesi kezeńine daiyndyq júrgizilýde.
Jobany iske asyrýǵa salynǵan investitsiialardyń jalpy kólemi 5,1 mlrd teńgeni quraidy. Teatrdy jańǵyrtý jumysyn 2026 jyldyń sońyna deiin aiaqtaý josparlanǵan.
Áleýmettik jáne mádeni infraqurylymdy damytý «Qazaqmys» qyzmetiniń basym baǵyttarynyń biri bolyp qala beredi. Kompaniia Ulytaý oblysynda mádeniet, sport, bilim berý, densaýlyq saqtaý nysandaryn jáne abattandyrý nysandaryn qamtityn aýqymdy áleýmettik investitsiialyq baǵdarlamany júzege asyrýda. Biyl kompaniianyń qoldaýymen óńirde iske asyrylatyn áleýmettik jobalardyń jalpy kólemi 30 mlrd teńgeden asady.
Serke Qojamqulov atyndaǵy teatrdy jańǵyrtý óńirdiń mádeni murasyn saqtaýǵa qosylǵan mańyzdy úles bolmaq. Sonymen qatar joba Ulytaý oblysy turǵyndarynyń shyǵarmashylyq turǵydan damýyna qolaily jaǵdai jasaýǵa múmkindik beredi.
