Kórshi qyzdy qutqarmaq bolǵan kezde qaza tapqan Nurbol Berdiǵalievtiń jary joldasynyń qandai adam jáne bapker bolǵanyn, ony shákirtteri men jaqyndarynyń ne úshin qadirlegenin aityp berdi. Kóp balaly ana ári jesir kelinshek qazirgi qiyndyqtary men baspana máselesi, balalarynyń bolashaǵyna alańdaýshylyǵy týraly da bólisti, dep habarlaidy Dalanews.kz Sportburo.kz portalyna silteme jasap.
– Ózińiz jáne otbasyńyz jaily aityp berseńiz. Nurbol ekeýińiz qalai tanystyńyzdar?
– Meniń esimim - Baqytbai Aqbaian Yqylasqyzy. 1993 jyly Aqtóbe oblysy Baiǵanin aýdany Jarly aýylynda dúniege keldim. Nurbolmen 2013 jyly tanysyp, birden otbasyn qurdyq. Onyń er azamatqa tán qasietteri, sabyrlylyǵy men qamqorlyǵy birden unady. Onyń qazasynan keiin alty balamen qaldym: eki ulym (2014 jáne 2015 jyly týǵan) jáne tórt qyzym (2018, 2019, 2022 jyly týǵan), kenje qyzymyzǵa nebári bes ai ǵana boldy.
– Joldasyńyz qandai adam edi? Úide, otbasynda qandai edi? Onyń qandai qasietterin erekshe baǵalaisyz?
– Nurbol óte tártipti, eńbekqor adam bolatyn. Tańnan erte ketip, keshke bir-aq keletin. Bar ýaqytyn jumysyna arnaityn. Túste ǵana úige kelip, azdap demalyp alyp, qaita jattyǵýǵa ketetin. Sondai-aq ol óte qamqor áke boldy. Balalaryn shyn jaqsy kórip, olarǵa baryn berýge tyrysatyn – meiirimin, ýaqytyn, jaqsy tárbiesin.
– Demek, jattyqtyrýshy bolý - onyń jai jumysy emes, ómiriniń máni bolǵany ǵoi?
– Iá, Nurbol jumysyn jan-tánimen súietin. Shákirtteri jarystarda jeńiske jetse, birden demeýshi izdep, olardy yntalandyrýǵa tyrysatyn. Ol úshin jattyqtyrýshy ǵana emes, naǵyz tálimger bolatyn. Keide men oǵan «bárin shákirtterińe arnap kettiń» dep ázildep te renjitinmin. Ol bolsa: «Olardyń jeńisi – meniń de nátijem» deitin. Óziniń muqtajyn umytyp ketse de, balalary men shákirtteri úshin bárin berýge daiyn turatyn.
– Siz ony óte jyly, shynaiy eske alyp otyrsyz. Al onyń dostary men áriptesteri ne dep aityp júretin edi?
– Ol sport – meniń ómirim, onsyz maǵan bári mánsiz deitin. Ózge bir ispen ainalysýdy tipti elestete almaityn. Dostary, áriptesteri, kórshileri bir aýyzdan: «Nurbol - jattyqtyrýshy bolý úshin týǵan, naǵyz muǵalim edi», – dep aityp otyratyn.
– Nurbol ómiriniń naǵyz gúldengen kezinde ómirden ótti. Sizderdiń qandai arman, josparlaryńyz bar edi?
– Armandarymyz ortaq edi, josparymyz kóp boldy. Ol óz qolymen úiimizge asúi salyp berdi. Meniń fastfýd pisirip satý isimdi bastaýym úshin. Bul kásibimdi ýaqytsha toqtatýǵa májbúrmin, sebebi qazir bes ailyq balamen otyrmyn. Ol árdaiym: «Bul - seniń isiń, jaqsy alyp ketesiń» dep qoldaityn. Balalarmen qansha sharshasam da, onyń janynda bolýǵa tyrysatynmyn. Biz bir-birimizge tireý edik.
– Qazirgi tańda otbasyńyzdy asyraý úshin qandai qarjylyq kózińiz bar?
– Qazir memleketten ai saiyn 94 000 teńge járdemaqy alamyn. Osy qarajatpen balalardy asyrap otyrmyn. Budan basqa tabys kózi joq.
– Siz úidi memlekettik baǵdarlama arqyly ipotekamen alǵanyńyzdy aityp qaldyńyz. Ol áli tolyq tólenbegen eken. Osyǵan bailanysty qoǵamǵa qandai ótinishińiz bar?
– Shyny kerek, qazir óte qiyn. Úidi 2019 jyldyń qyrkúieginde memlekettik baǵdarlama aiasynda satyp aldyq. Ol kezde baǵasy shamamen 2,5 million teńge edi. Barlyq tólemderdi kúieýim ózi jasap keldi, men bul jaǵyna múlde bas qatyrmaitynmyn. Qazir alty balamen jalǵyz qaldym, ne bolatynyn bilmeimin. Úi áli memleket menshiginde. Sol sebepti ony otbasymyzdyń atyna aýdarýǵa kómektesýlerińizdi suraimyn. Bul másele tezirek sheshilse eken deimin.
Eske sala keteiik, 17 maýsymda Aqtóbe oblysy Baiǵanin aýdany Jarly aýylynda qaiǵyly oqiǵa boldy. Mektep oqýshysy tereńdigi 10 metr bolatyn qaraýsyz qalǵan qudyqqa qulap ketken. Kómekke kelgen kórshisi, erkin kúres jattyqtyrýshysy Nurbol Berdiǵaliev qyzdy qutqarýǵa umtylǵan, ókinishke qarai, ol da, 9 jastaǵy qyz bala da oqiǵa ornynda kóz jumdy.
Nurbol Berdiǵaliev 2017 jyly Jarly aýylyna qonys aýdaryp, balalar-jasóspirimder sport mektebinde jattyqtyrýshy qyzmetin atqarǵan. Osy ýaqyt ishinde ol ondaǵan respýblikalyq jáne oblystyq jarys jeńimpazdaryn tárbielep úlgergen. Shamamen 20-ǵa jýyq shákirti sport sheberligine kandidat atanǵan.
