Dúniejúzilik bank Eýropa men Ortalyq Aziiadaǵy kólik infraqurylymyn damytýǵa qajetti investitsiialar týraly jańa baiandama jariialady, dep habarlaidy dalanews.kz.
Qujatta Qazaqstan kiretin Transkaspii halyqaralyq kólik dálizin damytý óńir ekonomikasyna aitarlyqtai serpin berýi múmkin ekeni aitylǵan.
Baiandamaǵa sáikes, temirjol infraqurylymyna, porttar men logistikaǵa strategiialyq investitsiia salý arqyly Orta dálizdegi júk tasymaly kólemin úsh eseden astam arttyrýǵa bolady. Sonymen qatar jetkizý ýaqytyn eki esege qysqartý múmkindigi qarastyrylǵan.
Dúniejúzilik banktiń baǵalaýynsha, tiisti sharalar júzege asqan jaǵdaida 2040 jylǵa qarai dáliz boiyndaǵy elderdiń jalpy ishki ónimi 3,3%-ǵa artyp, qosymsha 2 mln jumys orny qurylýy múmkin.
«Transkaspii kólik dálizi ekonomikalyq ósýdiń, ekonomikany ártaraptandyrýdyń, kedeilikti azaitýdyń jáne dáliz boiyndaǵy elderge jeke investitsiia tartýdyń qýatty qozǵaýshy kúshine ainala alady. Ol júkter men jolaýshylardy tasymaldaýdy ǵana qamtamasyz etetin kólik dálizinen iskerlik belsendilikti, jumys oryndaryn qurýdy jáne jergilikti ónerkásiptiń ósýin yntalandyratyn óńirlik platformaǵa ainalý áleýetine ie», – dedi Dúniejúzilik banktiń Eýropa jáne Ortalyq Aziia boiynsha vitse-prezidenti Antonella Bassani.
Onyń aitýynsha, bul úshin fizikalyq infraqurylymmen qatar kólik qyzmetterine investitsiia salý, saýda rásimderin jeńildetý, tasymaldaý operatsiialaryn jetildirý jáne shekaraaralyq yntymaqtastyqty kúsheitý qajet.
Orta dáliz Shyǵys Aziiany Ortalyq Aziia, Ońtústik Kavkaz, Túrkiia jáne Eýropamen bailanystyrady. Baǵytty damytý toǵyz elge – Ázerbaijan, Armeniia, Grýziia, Qazaqstan, Qyrǵyz Respýblikasy, Tájikstan, Túrkiia, Túrikmenstan jáne Ózbekstanǵa qatysty.
Dúniejúzilik banktiń málimetinshe, bul elderde shamamen 200 mln adam turady. Dálizdiń ótkizý qabiletin arttyrý naryqtarǵa qoljetimdilikti jaqsartyp, jańa ekonomikalyq múmkindikter qalyptastyrýy múmkin.
Baiandamada jahandyq jetkizý tizbekterindegi úzilister men klimattyq ózgeristerge bailanysty táýekelder jaǵdaiynda jyldam ári senimdi saýda baǵyttarynyń mańyzy artyp otyrǵany atap ótilgen.
Dúniejúzilik banktiń baǵalaýynsha, 2040 jylǵa deiin Orta dálizdiń fizikalyq infraqurylymyn damytýǵa 25 mlrd dollardan astam investitsiia qajet. Qarajattyń negizgi bóligi temirjol jelilerine, teńiz porttaryna jáne avtomobil joldaryna aparatyn kirme joldarǵa baǵyttalýy tiis.
