Atyraý irgesindegi Erkinqala aýylynda bes jyl buryn paidalanýǵa berilgen memlekettik balabaqsha jabyldy. Sebebi bóbekjaidyń irgetasy shógip, úlken jaryqshaqtar paida bolǵan. Bul jaǵdai ata-analardyń narazylyǵyn týǵyzdy. Óitkeni endi turǵyndar ul-qyzdaryn alys eldimekenge aparýǵa májbúr. Olar aýyldaǵy jalǵyz mektepke deiingi bilim berý mekemesiniń qurylysyn qadaǵalamaǵan sheneýnikterdi kinálap otyr, dep habarlaidy Dalanews.kz 31 arnaǵa siltep.
Memlekettik balabaqshanyń jabylǵanyn estigen ata-analar ań-tań. Sebebi jap-jańa bóbekjai bar bolǵany bes jyl jumys istegen. Munda 200-den asa ul-qyz tárbielenip kelgen. Endi turǵyndar balalarymyzdy kórshi aýylǵa tasyp áýre-sarsańǵa túsemiz dep qapaly.
"Úiimizge jaqyny osy edi. Bizge qiyn bolyp tur. Sebebi balalarymyzdy basqa jaqqa aýystyrǵanymyzben balalar barǵysy kelmeidi. Jylaidy, óz bóbekjailaryna barǵysy keledi", - deidi Erkinqala aýylynyń turǵyny Láila Qalieva.
Telearna málimetinshe, 290 oryndyq balabaqsha qazir jabyq tur. Syrty bútin bolǵanymen ishi qirap jatyr.
Balabaqshanyń búlinip jatqanyn qyzmetkerler kórip, birden dabyl qaǵypty. Olar mundai nysanda jumys isteý óte qaýipti ekenin aitady. Sondyqtan arnaiy mamandardy shaqyrtyp, saraptama jasatqan.
"Mamannyń aitýy boiynsha balanyń qaýipsizdigi úshin olardy qabyldaýǵa bolmaidy. Sony negizge ala otyryp, maýsymnan bastap qalalyq bilim bóliminiń sheshimi boiynsha qalypty jaǵdaidaǵy jumysyn toqtatty. Alǵa qarai endi eńbek demalys bitken soń qalalyq bilim bólimi basshysy qyzmetkerlerdi, tárbieshilerdi jaqyn mańdaǵy bóbekjailarǵa ornalystyramyz dep otyr", - deidi №37 “Bolashaq” balabaqshasynyń basshysy Gúlbaný Qonaeva.
Al qurylys basqarmasyndaǵylar eki qabatty ǵimaratty salýǵa biýdjetten 700 million teńgege jýyq qarajat ketkenin jetkizdi. Olar ǵimaratty qabyldap alǵan kezde eshqandai aqaý bolmaǵan dep aqtaldy.
Sheneýnikter balabaqshada kúrdeli jóndeý jumystaryn júrgizýdi josparlaǵan. Qurylys qashan bastalatyny ázirge belgisiz.
