Sankt-Peterbýrg soty Qazaqstanda dúniege kelgen Iaroslava Chýmakovany qamaýǵa aldy. Oǵan “terakt jasaýǵa járdemdesti” degen aýyr aiyp taǵyldy, dep habarlaidy Dalanews.kz.
Tergeý nusqasyna súiensek, Chýmakova Ýkraina arnaiy qyzmetimen bailanys ornatyp, Resei Qorǵanys ministrligi qyzmetkerleri men olardyń otbasy múshelerine qatysty málimetterdi jinap bergen. Atap aitqanda, olardyń turǵylyqty mekenjaiy men minetin kólikteri týraly aqparat tapsyrǵany aitylýda.
Chýmakova 19 maýsymda ustalǵan. Alǵashqyda oǵan resmi aiyp taǵylmaǵan. Endi ol 17 tamyzǵa deiin tergeý izoliatorynda qamaýda bolady.
Aita keteiik, bul Qazaqstan azamattaryna qatysty qozǵalǵan jalǵyz is emes. Buǵan deiin Reseide terakt uiymdastyrmaq bolǵan eki qazaqstandyqtyń mert bolǵany týraly jazǵan edik.
BAQ-ta Resei Federatsiiasynda Qazaqstannyń eki azamatynyń terrorlyq akti jasaýdy uiymdastyrýǵa áreketi kezinde Reseidiń kúshtik qurylymdarymen kózi joiylǵany týraly aqparat taraǵan bolatyn.
UQK bul adamdardyń Qazaqstandyq azamattyǵy baryn jáne Reseige shyqqandyǵyn rastady.
Kórsetilgen fakti boiynsha UQK sotqa deiingi tergep-tekserý júrgizip jatyr.
Tekseris yntymaqtastyq arnasy aiasynda Resei FQQ-men tyǵyz bailanysta júzege asyrylyp jatyr.
Ózge aqparat Qylmystyq-protsestik kodekstiń 201-baby 1-bóligine sáikes jariia etýge jatpaidy.
Sonymen qatar Temirtaýdyń týmasy, “Sulýlar armiiasy” eriktiler qozǵalysynyń negizin qalaýshy Nadejda Rossinskaia (Nadin Geisler) Ýkraina Qarýly kúshterin qoldady degen aiyppen 22 jylǵa bas bostandyǵynan aiyrylǵan edi.
Sarapshylar keiingi ýaqytta Reseide shetel azamattaryn túrli tásilmen — tipti jasandy intellektpen jasalǵan dipfeik videolar arqyly soǵysqa tartýǵa tyrysý áreketteriniń jiilegenin aitady.
