Senat tóraǵasy Máýlen Áshimbaev eks-prezident Nursultan Nazarbaevtyń Máskeýge jasaǵan saparyna qatysty Senat dálizinde túsinikteme berdi, dep habarlaidy Dalanews.kz.
Onyń aitýynsha, bul sapar resmi mártebege ie emes jáne jeke sipatta ótken.
"Eks-prezidentter ózge elderdiń saiasatkerlerimen kezdesýge quqyly. Bul jeke sharalar sheńberinde ótti", – dedi Áshimbaev.
Sondai-aq, ol mundai jeke kezdesýlerge úlken mán bermeýge shaqyrdy.
"Qazaqstannyń memlekettik jáne syrtqy saiasatyn Memleket basshysy Qasym-Jomart Kemeluly Toqaev aiqyndaidy jáne júzege asyrady", – dep túiindedi Senat spikeri.
Jýyrda eks-prezident Nursultan Nazarbaevtyń Máskeýge saparynan keiin qoǵamda túrli alyp-qashpa áńgimeler taǵy da jeldei esti. Buǵan deiin depýtat Rinat Zaiyt bul taqyryp týrasynda pikir bildirdi.
"Bizde bári múmkin negizinde (2029 jyly Nazarbaev óz kandidatýrasyn ákelýi múmkin be degen saýalǵa - esk.). Ony qoldap otyrǵan top az emes, moiyndaý kerek, jasyrmaý kerek. Qarapaiym halyqtyń ishinen aityp otyrmyn. Bir ret meshitke de kirip shyqty ǵoi. Qai jerge aparsań da eshkim betine shyǵyp, "sen, halyqty tonadyń" dep aitpaidy. Kerisinshe bizdiń qazaq "bata berińiz" dep aitady. Sosyn úiine baryp, "anaý ońbaǵan bizdi tonady" dep aitady. 2029-da kele me, men tańǵalmaimyn, bizde Qazaqstanda bári múmkin. Múmkin emes deýge bolmaidy", - dedi ol.
