Senat depýtaty, İİM basshysynyń burynǵy orynbasary Marat Qojaev "Qýandyq Bıshimbaev jazasyn ótep jatqanyn rastaıtyn nege birde-bir foto-vıdeo joq?" degen saýalǵa jaýap berdi, - dep habarlaıdy Dalanews.kz Tengrinews.kz-ke siltep.
Senat kýlýarynda jýrnalıser Qojaevtan sottalǵan burynǵy ulttyq ekonomıka mınıstri nege kópshilikke kórsetilmeıtinin surady.
Qojaevtyń sózinshe, Bıshimbaevty Qylmystyq-atqarý júıesi komıtetinde (QAJK) kórsetpeýine sebep - eks-mınıstrdiń ózin sýret-vıdeoǵa túsirgenin qalamaýy.
"Munyń bári azamattardyń quqyǵyn qorǵaýǵa baılanysty. Tipti jazasyn ótep jatqan azamattyń da azamattyq quqyǵy bar. Eger ol ózin kórsetkisi kelmese, árıne, ony májbúrleý múmkin emes. Keshirińizder, dóreki túrde aıtaıyn: bul haıýanattar baǵy emes. Resmı ókilderge sený kerek. Ol Stepnogorsk qalasyndaǵy qaýipsizdigi eń joǵary kolonıada otyr", - dep túsindirdi Qojaev.
Aıta keteıik, jýyrda áleýmettik jelide Bıshimbaev qazaqstandyq kolonıalardan tabylmaǵany týraly aqparat tarady. Keıbir buqaralyq aqparat quraldary Bıshimbaev jazasyn Stepnogorsk nemese Arshalyda ótep jatqanyn jazdy.
2024 jyly 26 maýsymda Qýandyq Bıshimbaev pen Baqytjan Baıjanovqa qatysty qylmystyq istiń apelásıalyq sot otyrysy bolǵan edi. Alaıda olardyń apelásıalyq ótinishi qanaǵattandyrylmady.
Qýandyq Bıshimbaev 24 jylǵa, inisi Baqytjan Baıjanov 4 jylǵa sottalǵan bolatyn.
Áıelin óltirgeni úshin qamaýǵa alynǵan Qýandyq Bıshimbaev eń joǵary qaýipsizdik mekemesinde jazasyn ótep jatyr.
Buǵan deıin de QAJK ókilderi kolonıada eks-mınıstr úshin qolaıly oryn áli bos emes ekenin, sondyqtan jumysqa turmaǵanyn málimdedi.
Al 12 qarashada apelásıalyq alqa Qýandyq Bıshimbaevty ata-ana quqyǵynan aıyrý týraly shaǵymmen onyń burynǵy áıeliniń talap aryzyn qarady.
Sot málimetinshe, eks-mınıstr balalarynyń tegin ózgertýine qarsy bolmady, alaıda ony ata-ana quqyǵynan aıyrmady.
