Qorǵanys ministriniń orynbasary Shaih-Hasan Jazyqbaev áskerden jaltaryp júrgenderdi kósheden ustap áketýge bolatynyn málimdedi, dep habarlaidy Dalanews.kz.
Senattaǵy kezdesýde BAQ ókilderiniń tarapynan Jazyqbaevqa áleýmettik jelilerde áskerge shaqyrylǵan azamattardy kúshpen alyp ketý týraly beinejazbalar taralyp jatqanyna bailanysty saýal qoiyldy.
Jazyqbaev bul sharalardyń zań sheńberinde oryndalyp jatqanyn aitty. Áskeri boryshyn ótemegen árbir azamat jaýapkershilikke tartylatynyn jáne eger qashyp, zań ókilderine qarsylyq bildirse, olardy kósheden ustap, tiisti shara qoldanylatynyn málimdedi.
“Árbir Qazaqstan azamaty Qarýly kúshter qatarynda áskeri mindetin atqarýǵa mindetti”, dep atap ótti ol.
Eske salaiyq, “Astana” telearnasy 2024 jylǵy kóktemgi áskerge shaqyrý naýqany kezinde Qazaqstanda 20 myńǵa jýyq jas azamat áskerge barýdan bas tartqanyn habarlaǵan edi.
Qorǵanys ministrliginiń ókilderi Otan aldyndaǵy boryshyn óteýden qashatyn jastardyń sanynyń azaiyp kele jatqanyn aitqanymen, bul problema áli de bar ekenin joqqa shyǵarmady. Áskerden qashý faktilerine qatysty ákimshilik jáne qylmystyq jaýapkershilik qarastyrylǵan.
“Reidter zań aiasynda júrgiziledi. Áskeri basqarý organdary shaqyrý qaǵazyn tapsyra almaǵan jaǵdaida, bul is jergilikti ishki ister organdaryna beriledi. Kóshelerde, qoǵamdyq oryndarda áskerge barýdan jaltarǵandardy anyqtaý úshin reidter ótkizý — zańdy shara”, — dedi “Astana” telearnasyna QR Qarýly kúshteri Bas shtaby uiymdastyrý-jumyldyrý jumysy departamenti bastyǵynyń orynbasary Farhat Aidarbaev.
