قورعانىس ءمينيسترىنىڭ ورىنباسارى شايح-حاسان جازىقبايەۆ اسكەردەن جالتارىپ جۇرگەندەردى كوشەدەن ۇستاپ اكەتۋگە بولاتىنىن مالىمدەدى، دەپ حابارلايدى Dalanews.kz.
سەناتتاعى كەزدەسۋدە ب ا ق وكىلدەرىنىڭ تاراپىنان جازىقبايەۆقا الەۋمەتتىك جەلىلەردە اسكەرگە شاقىرىلعان ازاماتتاردى كۇشپەن الىپ كەتۋ تۋرالى بەينەجازبالار تارالىپ جاتقانىنا بايلانىستى ساۋال قويىلدى.
جازىقبايەۆ بۇل شارالاردىڭ زاڭ شەڭبەرىندە ورىندالىپ جاتقانىن ايتتى. اسكەري بورىشىن وتەمەگەن ءاربىر ازامات جاۋاپكەرشىلىككە تارتىلاتىنىن جانە ەگەر قاشىپ، زاڭ وكىلدەرىنە قارسىلىق بىلدىرسە، ولاردى كوشەدەن ۇستاپ، ءتيىستى شارا قولدانىلاتىنىن مالىمدەدى.
“ءاربىر قازاقستان ازاماتى قارۋلى كۇشتەر قاتارىندا اسكەري مىندەتىن اتقارۋعا مىندەتتى”، دەپ اتاپ ءوتتى ول.
ەسكە سالايىق، “استانا” تەلەارناسى 2024 جىلعى كوكتەمگى اسكەرگە شاقىرۋ ناۋقانى كەزىندە قازاقستاندا 20 مىڭعا جۋىق جاس ازامات اسكەرگە بارۋدان باس تارتقانىن حابارلاعان ەدى.
قورعانىس مينيسترلىگىنىڭ وكىلدەرى وتان الدىنداعى بورىشىن وتەۋدەن قاشاتىن جاستاردىڭ سانىنىڭ ازايىپ كەلە جاتقانىن ايتقانىمەن، بۇل پروبلەما ءالى دە بار ەكەنىن جوققا شىعارمادى. اسكەردەن قاشۋ فاكتىلەرىنە قاتىستى اكىمشىلىك جانە قىلمىستىق جاۋاپكەرشىلىك قاراستىرىلعان.
“رەيدتەر زاڭ اياسىندا جۇرگىزىلەدى. اسكەري باسقارۋ ورگاندارى شاقىرۋ قاعازىن تاپسىرا الماعان جاعدايدا، بۇل ءىس جەرگىلىكتى ىشكى ىستەر ورگاندارىنا بەرىلەدى. كوشەلەردە، قوعامدىق ورىنداردا اسكەرگە بارۋدان جالتارعانداردى انىقتاۋ ءۇشىن رەيدتەر وتكىزۋ — زاڭدى شارا”، — دەدى “استانا” تەلەارناسىنا ق ر قارۋلى كۇشتەرى باس شتابى ۇيىمداستىرۋ-جۇمىلدىرۋ جۇمىسى دەپارتامەنتى باستىعىنىڭ ورىنباسارى فارحات ايداربايەۆ.
