Taiaýda Jańaózende qala ákimi Janseit Qainarbaev qala turǵyndarymen kezdesip, olardyń muń-muqtajyna nazar aýdardy. Osyndai kezdesýde zeinet jasyndaǵy qala turǵyny ortaǵa shyǵyp, ákimnen óziniń balasyn munai kompaniiasyna jumysqa ornalastyrýdy talap etti.
Munaily ólkede turatyn halyqtyń kópshiligi munai kompaniialarynda jumys istegendi jón kóredi. Alaida, barlyǵyn munai kompaniialaryna jumysqa ornalastyrý múmkin emes. Munai kompaniialaryna jumysqa qabyldaýdyń arnaiy kezegi bar.
Ákimmen bolǵan kezdesýde jańaózendik zeinetker «Ózenmunaigaz» kompaniiasynyń qoldaýymen munaishy mamandyǵyn qyzyl diplommen bitirgen qyzyn munai kompaniiasyna jumysqa ornalastyrýdy ótindi.
Óz kezeginde ákim munai kompaniialaryna jumysqa turý úshin arnaiy kezek túzilgenin aityp, qala turǵynyna qyzyn osy kezekke jazylýǵa jáne ortaq tártip boiynsha jumysqa qabyldanýǵa keńes berdi.
– Qazir BJB mekemesinen zeinetke shyqqan birneshe azamat balalaryn kezekten tys munai kompaniialaryna jumysqa ornalastyrýdy talap etýde. Bul – orynsyz ótinish. Munai kompaniialaryna jumysqa turý úshin júzdegen maman kezekte tur. Olardyń aldyn orap, zeinetker munaishylardyń balalaryn jumysqa turǵyzsaq, ádiletsizdik bolar edi. Kezekte turǵan halyqtyń aldynda bulaisha ádiletsizdikke jol berýge bolmaidy. Olar da basqa qarapaiym azamattar siiaqty kezekke turýy kerek. «Munaishynyń balasy – munaishy bolýy kerek» degen talap joq. Jastar basqa da mamandyqtardy igerýi kúsh salýy kerek, – dep ákim oiyn ashyq aitty.
