Qaraǵandy oblysynda politsiia sabaqqa kelmei júrgen stýdentti sotqa bergen. Is kámeletke tolmaǵandardyń isteri jónindegi mamandandyrylǵan aýdanaralyq sotynda qaraldy, - dep habarlaidy Dalanews.kz.
Politsiia jazǵan aryzda Qaraǵandy agrotehnikalyq kolledjiniń 16 jastaǵy 2-kýrs stýdentiniń sabaqqa barmaýy, ata-anasynyń ulyna tárbie bermeýi, oǵan kóńil bólmeýi jáne oqýyn qadaǵalamaýy týraly aitylǵan.
Sotta myna jaittar anyqtalǵan:
- 71 jastaǵy naýqas ájesine kútim jasaýyna bailanysty sabaqty shynymen bosatqanyn jáne bilim alǵysy keletinin rastaidy;
- beiresmi tabysynyń bir bóligin ájesine berip, qalǵanyn úi qajettilikterine (otyn men kómir satyp alýǵa) jáne kiim-keshekke jumsaǵan;
- esepte turmaǵan, qańǵybastyq, alkogoldik ishimdikterdi nemese esirtki zattaryn tutyný faktileri baiqalmaǵan, qoǵamdyq tártipti buzbaǵan, qylmystyq nemese ákimshilik jaýapkershilikke tartylmaǵan, politsiialyq esepte joq.
Ata-anasy bala tárbiesine kóńil bólmegen jáne oǵan qamqorlyq kórsetpegen, olar basqa qalada turady.
Stýdenttiń anasyna "Kámeletke tolmaǵan balalaryn tárbieleý, oqytý jáne baǵyp-qaǵý boiynsha óz mindetterin oryndamaǵan ata-ana" sanaty boiynsha esepke alynyp, alkogoldik ishimdikterdi ishkeni jáne ata-anasynyń balany tárbieleý, oqytý jáne kútip-baǵý jónindegi mindetterin oryndamaǵany úshin ákimshilik jaýapkershilik qarastyryldy.
Stýdenttiń ákesi ata-ana retinde ulyna durys kóńil bólmegenin moiyndap, basqarmanyń málimdemesimen kelispeitinin bildirdi.
Prokýror aryzdan bas tartý týraly sheshim qabyldady. Osyny eskergen sot politsiia basqarmasynyń aryzyn qanaǵattandyrýdan bas tartty.
Aldaǵy ýaqytta kámeletke tolmaǵandardyń quqyqtarynyń buzylýyna jol bermeý maqsatynda ýákiletti organdarǵa arnaiy uiǵarym shyǵaryldy.
Sot áleýmettik jáne otbasyn damytý uiymdarymen birlesip kámeletke tolmaǵandy keshki mektepke qabyldaý sharalaryn qabyldady. Sheshim zańdy kúshine endi.
