قاراعاندى وبلىسىندا پوليسيا ساباققا كەلمەي جۇرگەن ستۋدەنتتى سوتقا بەرگەن. ءىس كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىندا قارالدى، - دەپ حابارلايدى Dalanews.kz.
پوليسيا جازعان ارىزدا قاراعاندى اگروتەحنيكالىق كوللەدجىنىڭ 16 جاستاعى 2-كۋرس ستۋدەنتىنىڭ ساباققا بارماۋى، اتا-اناسىنىڭ ۇلىنا تاربيە بەرمەۋى، وعان كوڭىل بولمەۋى جانە وقۋىن قاداعالاماۋى تۋرالى ايتىلعان.
سوتتا مىنا جايتتار انىقتالعان:
- 71 جاستاعى ناۋقاس اجەسىنە كۇتىم جاساۋىنا بايلانىستى ساباقتى شىنىمەن بوساتقانىن جانە ءبىلىم العىسى كەلەتىنىن راستايدى؛
- بەيرەسمي تابىسىنىڭ ءبىر بولىگىن اجەسىنە بەرىپ، قالعانىن ءۇي قاجەتتىلىكتەرىنە (وتىن مەن كومىر ساتىپ الۋعا) جانە كيىم-كەشەككە جۇمساعان؛
- ەسەپتە تۇرماعان، قاڭعىباستىق، الكوگولدىك ىشىمدىكتەردى نەمەسە ەسىرتكى زاتتارىن تۇتىنۋ فاكتىلەرى بايقالماعان، قوعامدىق ءتارتىپتى بۇزباعان، قىلمىستىق نەمەسە اكىمشىلىك جاۋاپكەرشىلىككە تارتىلماعان، پوليسيالىق ەسەپتە جوق.
اتا-اناسى بالا تاربيەسىنە كوڭىل بولمەگەن جانە وعان قامقورلىق كورسەتپەگەن، ولار باسقا قالادا تۇرادى.
ستۋدەنتتىڭ اناسىنا "كامەلەتكە تولماعان بالالارىن تاربيەلەۋ، وقىتۋ جانە باعىپ-قاعۋ بويىنشا ءوز مىندەتتەرىن ورىنداماعان اتا-انا" ساناتى بويىنشا ەسەپكە الىنىپ، الكوگولدىك ىشىمدىكتەردى ىشكەنى جانە اتا-اناسىنىڭ بالانى تاربيەلەۋ، وقىتۋ جانە كۇتىپ-باعۋ جونىندەگى مىندەتتەرىن ورىنداماعانى ءۇشىن اكىمشىلىك جاۋاپكەرشىلىك قاراستىرىلدى.
ستۋدەنتتىڭ اكەسى اتا-انا رەتىندە ۇلىنا دۇرىس كوڭىل بولمەگەنىن مويىنداپ، باسقارمانىڭ مالىمدەمەسىمەن كەلىسپەيتىنىن ءبىلدىردى.
پروكۋرور ارىزدان باس تارتۋ تۋرالى شەشىم قابىلدادى. وسىنى ەسكەرگەن سوت پوليسيا باسقارماسىنىڭ ارىزىن قاناعاتتاندىرۋدان باس تارتتى.
الداعى ۋاقىتتا كامەلەتكە تولماعانداردىڭ قۇقىقتارىنىڭ بۇزىلۋىنا جول بەرمەۋ ماقساتىندا ۋاكىلەتتى ورگاندارعا ارنايى ۇيعارىم شىعارىلدى.
سوت الەۋمەتتىك جانە وتباسىن دامىتۋ ۇيىمدارىمەن بىرلەسىپ كامەلەتكە تولماعاندى كەشكى مەكتەپكە قابىلداۋ شارالارىن قابىلدادى. شەشىم زاڭدى كۇشىنە ەندى.
