I. Jansúgirov atyndaǵy Jetisý ýniversiteti men Qazaqstan Respýblikasy Qarjylyq monitoring agenttiginiń Jetisý oblysy boiynsha Ekonomikalyq tergep-tekserý departamenti arasynda yntymaqtastyq týraly memorandýmǵa qol qoiyldy, dep habarlaidy dalanews.kz.
Jiyn «Zań men tártip» qaǵidatyn nyǵaitý aiasynda «JAŃARÝ» sybailas jemqorlyqqa qarsy jalpyulttyq qozǵalysymen birlesip uiymdastyryldy.
Kezdesý barysynda Jetisý ýniversitetiniń Basqarma tóraǵasy – Rektor Ermek Bóribaev departamentpen oqý-tájiribelik baǵytta kóp jyldan beri áriptestik bailanys ornaǵanyn atap ótti.
«Biz Ekonomikalyq tergep-tekserý departamentimen tyǵyz jumys istep kelemiz. Ýniversitet stýdentteri jyl saiyn departamentte kásibi praktikadan ótedi. Jetisý oblysyndaǵy jetekshi joǵary oqý oryndarynyń biri retinde ýniversitet óńirge qajetti bilikti kadrlardy daiarlaýǵa zor úles qosyp keledi. Búginde aimaqtaǵy memlekettik organdarda bizdiń ýniversitet túlekteriniń edáýir bóligi eńbek etedi», – dedi rektor.
Óz kezeginde Jetisý oblysy boiynsha Ekonomikalyq tergep-tekserý departamentiniń basshysy Dastan Býkashev stýdentterge praktikalyq bilim berýdiń mańyzdylyǵyna toqtaldy.
«Stýdenttermen ekonomikalyq quqyq buzýshylyqtardy anyqtaý jáne olardyń aldyn alý baǵytynda praktikalyq sabaqtar ótkizemiz. Tájiribe barysynda joǵary belsendilik tanytyp, bilimin kórsetken stýdentterdi bolashaqta jumysqa shaqyrýǵa múmkindik bar», – dedi Dastan Býkashev.
Sondai-aq ýniversitet rektory Ermek Bóribaev Dastan Baltabaiulyn Quqyq jáne ekonomika fakýltetiniń materialdyq-tehnikalyq bazasymen tanystyrdy. Qonaqtar fakýltettiń oqý aýditoriialaryn jáne sot protsesin ótkizýge arnalǵan arnaiy zaldy aralap kórdi.
Jiyn sońynda Qazaqstan Respýblikasy Qarjylyq monitoring agenttiginiń Jetisý oblysy boiynsha Ekonomikalyq tergep-tekserý departamentiniń Preventsiia jáne taldaý ázirlemeleri basqarmasynyń bastyǵy Meiram Qasymbekov stýdentterge «Dropperlik: kiberqylmyskerlerdiń quralyna ainalmaý joldary» taqyrybynda dáris oqydy.
Dáris barysynda stýdentterge aqparattyq paraqshalar taratylyp, dropperlik shemalardyń qaýipteri, kiberqylmyskerlerdiń áreket etý tásilderi jáne zańsyz qarjylyq operatsiialarǵa tartylmaýdyń joldary túsindirildi.
Kezdesý interaktivti formatta ótip, stýdentter ózderin qyzyqtyrǵan suraqtaryn qoidy. Belsendilik tanytyp, durys jaýap bergen stýdentterge Ekonomikalyq tergep-tekserý departamenti atynan syilyqtar tabystaldy.
