Jekeshelendirýdiń 2016-2020 jyldarǵa arnalǵan keshendi jospary oryndalǵannan keıingi áleýmettik-ekonomıkalyq áserge taldaý júrgizildi, dep habarlaıdy Dalanews.kz.
"Buǵan deıin jekeshelendirý salasyndaǵy memlekettik saıasattyń tıimdiligine aýdıt júrgizilgen bolatyn. Joǵary aýdıtorlyq palata ulttyq holdıńter men ulttyq kompanıalardyń tıisti keshendi josparlarynyń respýblıkanyń damýyna tıgizetin áserin baǵalaý birqatar sebepterge baılanysty qıyn ekenin atap ótti. Osyǵan baılanysty QR Úkimetine taldaý júrgizý múmkindigin qaraý usynyldy", delingen 13 qarashadaǵy Joǵary aýdıtorlyq palata habarlamasynda.
Nátıjesinde Ulttyq ekonomıka mınıstrligi áleýmettik-ekonomıkalyq áserdi aıqyndaý úshin jekeshelendirilgen 771 uıym boıynsha statısıka men salyq organdarynyń derekterin taldady. Bul tujyrymdar keıinnen Memlekettik aktıvter men kvazımemlekettik sektordy basqarý jónindegi ulttyq baıandamaǵa engizildi.
Atap aıtqanda, mynadaı nátıjeler belgilendi:
- kvazımemlekettik sektor sýbektileriniń QR jalpy ishki ónimine qosqan úlesi 2016 jylǵy 8,6 trln teńgeden 2020 jyly 10,3 trln teńgege deıin ósti;
- jekeshelendirilgen uıymdar boıynsha negizgi kapıtalǵa ınvestısıalar kólemi 2023 jyly 57,5 mlrd teńgeni qurady – 98% óz qarajaty esebinen salyndy;
- jekeshelendiriletin uıymdardy satýdan memlekettik búdjetke túsken túsimder 578,8 mlrd teńgeni qurady;
- jekeshelendirilgen uıymdardan salyq túsimderi 2023 jyly 162 mlrd teńgeden astam somaǵa jetti.
"Jalpy júrgizilgen taldaý Jekeshelendirýdiń 2016-2020 jyldarǵa arnalǵan keshendi josparynyń oryndalýy oń makroekonomıkalyq áser bergenin kórsetedi. Máselen, memlekettiń ekonomıkaǵa qatysý úlesi JİÓ-ge qatysty 18,3%-dan 14,6%-ǵa deıin tómendedi. Sonymen qatar jekeshelendirilgen uıymdar qyzmetiniń beıini men jumyskerleriniń shtat sanyn saqtaý qamtamasyz etildi", - deıdi quzyrly vedomstvo.
