Almatydan Shymkentke baǵyt alǵan SCAT áýe kompaniiasynyń ushaǵy qolaisyz aýa raiyna bailanysty Tarazdaǵy qosalqy áýejaiǵa qonýǵa májbúr boldy, dep habarlaidy dalanews.kz.
Áleýmettik jelide jolaýshy Arai Tólegenniń aitýynsha, ushaq Shymkentke qonar aldynda shamamen 15 minýt boiy qatty týrbýlentti aimaqqa tap bolǵan. Sol sátte naizaǵai oinap, ushaq qatty shaiqalǵan.
«Qatty naizaǵai bastaldy. Óte kúshti týrbýlenttilik saldarynan ushaq qaýipsiz qona almai, qatty shaiqala bastady. Kóptegen jolaýshylar qorqyp ketti. Keibiri jylap, duǵa oqyp, Alladan medet surady. Bir sátte bári qaiǵyly aiaqtalatyndai kórindi», – deidi jolaýshy.
Onyń sózinshe, ushaqtyń Shymkentke emes, Tarazǵa baǵyt alǵany týraly jolaýshylarǵa aldyn ala habarlanbaǵan. Adamdar baǵyttyń ózgergenin tek túngi saǵat eki shamasynda qonǵannan keiin ǵana bilgen.
Oqiǵadan keiin jolaýshylardyń bir bóligi qaitadan sol ushaqqa minýden bas tartqan. Al shamamen saǵat 03:00-de Shymkentke qaita ushý jariialanǵan.
SCAT áýe kompaniiasy jaǵdaidy rastap, ekipajdyń Shymkenttegi aýa raiynyń kúrt nasharlaýyna bailanysty qosalqy áýejaiǵa qoný týraly sheshim qabyldaǵanyn málimdedi.
