Búgin, 14 qarashada Almatyda kórnekti qazaq jazýshysy, jýrnalist, Qazaqstan Jazýshylar odaǵynyń jáne Jýrnalister odaǵynyń múshesi Erkinbai Ákimqulovtyń qurmetine orai memorialdyq taqtanyń saltanatty ashylý rásimi ótti, dep habarlaidy Dalanews.kz.
Eskertkish taqta 1994-2019 jyldary jazýshy turǵan úidiń qabyrǵasyna, iaǵni Tólebaev kóshesindegi 187 úige ornatyldy.
Is-sharada aitýly tulǵanyń týystary men jaqyndary, sondai-aq Almaty qalasy Mádeiet basqarmasynyń basshysy Ǵani Mailybaev, Qazaqstan Jazýshylar odaǵynyń Basqarma tóraǵasy Mereke Qulkenov, M.O.Áýezov atyndaǵy Ádebiet jáne óner institýtynyń direktory Kenjehan Matyjanov, Qazaqstan Jýrnalister odaǵy qalalyq filialynyń direktory Áset Mataev, “Qazaq ádebieti” gazetiniń bas redaktory Baýyrjan Jaqyp, memleket jáne qoǵam qairatkerler men jazýshylar tóbe kórsetti.
“Ómir bolǵannan keiin onyń basy men aiaǵy bolady. Al maǵynaly ómir eshqashan ólmeidi. Mine, Erkinbai aǵamyz da maǵynaly ómir súrgen azamattardan edi. Búginde artynda qalǵan eńbegi men urpaǵynyń arqasynda aǵamyzdyń tegi óshpegenin kórip otyrmyz. Onyń jazǵan kitaptary men jasaǵan eńbekteri Jazýshylar odaǵynyń múshesi ǵana emes, jýrnalistika salasyna da qyrýar eńbegi sińgenin kórsetedi. Tipti, aǵamyzdyń partiiada da qyzmet etkeni kópshilikke aian. Endi taý tulǵanyń esimi Almatynyń kindigi sanalǵan Tólebaev kóshesinde jarqyrap turatyn bolady. Osy tusta, barshańyzǵa alǵys aitqym keledi. Bul komissiia qala ákimdiginiń bastamasy ǵana emes, sondai-aq eldiń ziialy qaýym ókilderi múshelik etetin komissiianyń da sheshimi boldy. Búgin osy memorialdyq taqtanyń ashylý saltanatynyń kýási bolyp otyrmyz. Qala jurtshylyǵyn aitýly kúnmen shyn júrekten quttyqtaimyn”, - dep atap ótti Almaty qalasy Mádeiet basqarmasynyń basshysy Ǵani Mailybaev.
Sonymen qatar shara barysynda M.O.Áýezov atyndaǵy Ádebiet jáne óner institýtynyń direktory Kenjehan Matyjanov ta sóz sóiledi.
“Erkinbai aǵa jaiynda bir máseleni erekshe basa aitqan jón dep oilaimyn. Bul kisi — taǵdyrly jazýshy. Jazýshy bolýy úshin oǵan kúrdeli taǵdyr kerek degen támsil sóz bar. Onyń týǵan jylyna nazar salsańyzdar 1937 jyl, iaǵni Qazaqstanda ataqty náýbet bolyp jatqan kez, qýǵyn-súrgin beleń alyp turǵan ýaqyt. Al balalyq shaǵy Ekinshi dúniejúzilik soǵystyń órtine órtendi. Soǵystan keiingi jaǵdai da sizderge málim. Jastyq shaǵy soǵystan keiingi halyq sharýashylyǵyn qalpyna keltirý siiaqty aýyr jyldarmen jalǵasyn tapty. Mine, ol osy taǵdyrǵa qaramastan, aǵysqa qarsy júze otyryp, óz taǵdyryn ózi jasaǵan jazýshy”, - dep qosty ol.
Aita keteiik, Erkinbai Ákimqulov 1937 jyly 4 qyrkúiekte Túrkistan oblysynda dúniege keldi. Ol túrli janrdaǵy 20-dan astam kórkem shyǵarmanyń avtory. Onyń qatarynda “Ózbekáli Jánibekov” ómirbaiandyq romany, 2013 jyly Qazaqstan Jazýshylar odaǵy QR memlekettik syilyǵyna usynylǵan “Shámshi Qaldaiaqov – án patshasy” roman-essesi bar. E.Ákimqulovtyń aýdarmashylyq tájiribesi bar, radio men teatrǵa birneshe pesalar jazǵan.
E.Ákimqulov eńbek jolyn “Leninshil jas” (qazirgi “Jas Alash”) gazetinde tilshi bolyp bastaǵan, keiin Almaty qalalyq partiia komitetinde, “Jalyn”, “Jazýshy”, “Raýan” aspalarynda, “Kitap” jarshysy” (“Drýg chitatelia”) gazetinde jaýapty qyzmetter atqarǵan.
