27 qyrkúiekte qazaqstandyq sportshy Iasmina Toqsanbaeva Aichi-Nagoia-2026 Aziia oiyndarynda sporttyq júris jarysynda Qytai sportshylaryn basyp ozyp, márege birinshi bolyp jetti, dep habarlaidy dalanews.kz UOK-qa siltep.
Jarys aiaqtalǵannan keiin World Athletics erejelerine sáikes áielder men erler arasynda júldeli oryndarǵa ie bolǵan úsh sportshynyń aiaq kiimi mindetti tekseristen ótken. Tekseris barysynda tehnikalyq delegattar Qazaqstan ókili Iasmina Toqsanbaeva kigen aiaq kiim World Athletics maquldaǵan modelder tiziminde joq ekenin anyqtaǵan.
Máseleni odan ári qaraý úshin qazaqstandyq sportshynyń aiaq kiimi sýretke túsirilip, tiisti málimettermen birge resmi qorytyndy alý úshin World Athletics-ke joldanǵan. Halyqaralyq federatsiianyń jaýaby kelgenge deiin marapattaý rásimi shegerilgen.
World Athletics sportshy kigen aiaq kiim jarystarda qoldanýǵa ruqsat etilgen modelder qataryna kirmeitinin resmi túrde rastaǵan. Halyqaralyq federatsiianyń qoldanystaǵy erejelerine sáikes mundai jaǵdaida sportshynyń nátijesi jaramsyz dep tanylyp, jarystyń qorytyndy hattamasyna tiisti ózgeris engiziledi.
Osy Aziia oiyndarynda mundai jaǵdai buǵan deiin jetisaiysta óner kórsetken irandyq sportshy Mohitzadege qatysty bolǵan. Tekseris barysynda onyń aiaq kiimi de World Athletics maquldaǵan modelder tiziminde joq ekeni anyqtalǵan. Erejege sáikes onyń nátijesi joiylǵan. Osylaisha, qorytyndy hattamaǵa ózgeris engizilgennen keiin buǵan deiin tórtinshi orynda turǵan qazaqstandyq Alina Chistiakova úshinshi orynǵa kóterilip, qola medal ielendi.
"Másele týyndaǵan sátten bastap Qazaqstannyń UOK qazaqstandyq sportshyǵa qoldaý kórsetý jáne apelliatsiiaǵa berý múmkindigin qarastyrý maqsatynda World Athletics, Asian Athletics Association, Aziia Olimpiada keńesi (AOK) jáne Qazaqstan Respýblikasynyń Jeńil atletika federatsiiasymen birlesip jumys istep jatyr", - dedi komitet ókilderi.
