Májilistiń Áleýmettik-mádeni damý komitetinde "Kreativti indýstriiany damytý" taqyrybynda talqylaý ótti. Otyrys barysynda máseleler men usynystar aitqandardyń biri - tanymal baspager Baqytjan Buqarbai.
Ol Reseige salynǵan sanktsiianyń qazaq baspagerleri úshin qandai ziiany baryn aitty, - dep habarlaidy Dalanews.kz.
Baqytjan Buqarbaidyń sózine sensek, Resei men Ýkraina arasyndaǵy soǵys bastalǵaly sanktsiia máselesi Reseidegi kitap salasyn ainalyp ótpegen.
"Resei baspagerleri sanktsiiaǵa ushyrap, olar qazir kóp kitap basyp, aýdaryp-shyǵarýǵa ruqsat ala almaidy. Sondyqtan zańdy kompaniialardy elimizdiń aýmaǵynda tirkedi. Basynda zańdy meken jai úshin tirkedi me dep oilasaq, olar myna jerge kelip te, naryqta bar tapsyrystardy alý úshin áreket etip jatyr. Árine, biz ashyq naryqpyz. Eshkimge tyiym sala almaimyz. Biraq býyny qatpaǵan qazaq baspagerleri úshin milliondaǵan biýdjeti bar reseiliktermen básekelestikke túsý - qiyn problema", - dedi baspager.
Ol "memleket protektsionizmge barý kerek" ekenin jetkizdi
"Reseilik bolsyn, basqa eldiń baspasy bolsyn, bizde qyzmet etetin bolsa, óz tilinde bir kitap shyǵarsa, qazaq tilinde de bir kitap shyǵarýǵa mindetteý kerek. Biz nege kitap shyǵarǵan kezde biznestiń eń tiimsiz formasymen ainalysyp jatyrmyz?! Óitkeni qazaq kontentin kitap salasynda da kóbeitkimiz keledi", - dedi ol.
Baqytjan Buqarbaidyń sózinshe, qazir Reseidiń kitaptary tym arzan.
"Biz shyǵarǵan kitaptar ortasha eseppen 5000 teńge dep alatyn bolsaq, 10 dollar kóleminde, bul - álemdik praktikada ortasha baǵa. Al reseilikterdiń marketpleisterinde satylatyn kitaptary 2-3 ese arzan. Keibireýin 600-700 teńgege jeńildikpen satyp alýǵa bolady. Shyǵyn ózindik qunnan da tómen.
Aqyryndap tamyryn bastasaq, "Resei Úkimeti baspalaryna úlken dotatsiia berip jatyr" degen aqparatqa qoljetkizdik. Áitpese arzan baǵa múmkin emes. Árine, bizdiń oqyrman "nege qazaq kitaptary qymbat?" renjidi. Bizge dotatsiia bolyp jatqan joq, barynsha arzandatyp berip jatyrmyz. Zań shyǵarýshylar osy máseleni qolǵa alsa degen nietimiz bar", - dedi baspager.
Aita keteiik, buǵan deiin qoǵamda Baqytjan Buqarbai baspalaǵan "Qazaqtardy qalai basqarý kerek?" atty kitap daý týdyrǵan bolatyn. Artynsha satylymnan alyp tastaldy.
Bul týraly AmalBooks baspasynyń negizin qalaýshy, baspager Baqytjan Buqarbai instagram-paraqshasynda aitty.
"Videony kórip kelgen janashyr aǵaiyndarymyz, baýyrlarymyz, aǵalarymyz bar, árqaisysymen jeke-jeke osy ýaqyt aralyǵynda kezdesip, maqsat-múddelerin túsindirip, jetkizip aittym. Biraq kitap shyǵaratyn baspager bolǵan soń biz keri bailanyspen de jumys isteýimiz kerek jáne eshqashan biz ózimizdi halyqtan biik qoiǵan joqpyz. Sonda kelýshilerdiń pikirin, keri bailanysyn tyńdap otyrsaq, olarǵa unamaǵany muqaba bolyp tur. Birden kitaptyń mazmunyn túsinbei qalasyń deidi. "Myna jazylǵan, sen aityp otyrǵan nárseler durys ta shyǵar, biraq myna muqaba sony ashpaidy, sondyqtan osyndai reaktsiiamyz bolyp jatyr" dep aitty. Sondyqtan biz búgin búkil satý núktelerinen bul kitapty túgel alyp tastadyq. Qazir eshbir jerde bul kitap satylymda joq", - dedi buǵan deiin baspager.
