Ánshi Roza Rymbaeva men depýtat Dáýlet Turlyhanovty aldap ketken kásipkerdiń isine qatysty jańa derekter shyqty, - dep habarlaidy Dalanews.kz.
Almaty qalalyq sotynyń baspasóz qyzmetiniń málimetinshe, 63 jastaǵy kásipker Serik Bekqaiyrovqa apelliatsiialyq shaǵym jábirlenýshilerdiń birinen túsken.
"Aldyn ala derekter boiynsha jábirlenýshilerdiń birine keltirilgen zalal somasy 39 million teńgeden 54 million teńgege deiin ulǵaityldy. Naqty soma sot aktisinde kórsetiledi", - dep habarlady sotta.
Eske salaiyq, buǵan deiin ánshi Roza Rymbaeva men depýtat Dáýlet Turlyhanovty aldap ketken kásipker sottalǵan bolatyn.
63 jastaǵy kásipker Serik Bekqaiyrov asyl tuqymdy jylqylar men avtomobilderdi satýmen ainalysqan. Kásipker alaiaqtyqtyń 4 epizody boiynsha 6 jyl, 8 ai merzimge sottaldy. Eki epizod boiynsha zardap shekken - ánshi Roza Rymbaeva men depýtat Dáýlet Turlyhanov.
Qylmystyq istiń materialdaryna sáikes, 2013 jyly jazda Bekqaiyrov Turlyhanovqa kelip, asfalt-beton zaýytyn salýǵa 1,2 million dollar suraǵan. Kásipker Turlyhanovqa zaýyttyń jartysyn beretinin aitqan. Depýtat suraǵan aqshasyn berip, kelisken.
Alaida sotta aiyptalýshy Turlyhanovty 1989 jyldan beri tanitynyn, ekeýi kórshi bolǵanyn, biraq depýtattan eshqandai aqsha almaǵanyn aitqan. Sotta kásipker qazir eshkim bireýge 1,2 million dollardy jaidan jai bere almaitynyn atap ótken.
"Tergeý izoliatorynda otyrǵan kezimde eki tergeýshi men Turlyhanovtyń adamdary kelip, 2 million dollar talap etip, qorqytty. Bul epizod boiynsha aiyptaý oidan shyǵarylǵan. Dáýlet Turlyhanovtyń tarapynan qorqytyp, úrkitý áli júrip jatyr", - deidi sotta Bekqaiyrov.
