ءانشى روزا رىمبايەۆا مەن دەپۋتات داۋلەت تۇرلىحانوۆتى الداپ كەتكەن كاسىپكەردىڭ ىسىنە قاتىستى جاڭا دەرەكتەر شىقتى، - دەپ حابارلايدى Dalanews.kz.
الماتى قالالىق سوتىنىڭ باسپا ءسوز قىزمەتىنىڭ مالىمەتىنشە، 63 جاستاعى كاسىپكەر سەرىك بەكقايىروۆقا اپەللياسيالىق شاعىم جابىرلەنۋشىلەردىڭ بىرىنەن تۇسكەن.
"الدىن الا دەرەكتەر بويىنشا جابىرلەنۋشىلەردىڭ بىرىنە كەلتىرىلگەن زالال سوماسى 39 ميلليون تەڭگەدەن 54 ميلليون تەڭگەگە دەيىن ۇلعايتىلدى. ناقتى سوما سوت اكتىسىندە كورسەتىلەدى"، - دەپ حابارلادى سوتتا.
ەسكە سالايىق، بۇعان دەيىن ءانشى روزا رىمبايەۆا مەن دەپۋتات داۋلەت تۇرلىحانوۆتى الداپ كەتكەن كاسىپكەر سوتتالعان بولاتىن.
63 جاستاعى كاسىپكەر سەرىك بەكقايىروۆ اسىل تۇقىمدى جىلقىلار مەن اۆتوموبيلدەردى ساتۋمەن اينالىسقان. كاسىپكەر الاياقتىقتىڭ 4 ەپيزودى بويىنشا 6 جىل، 8 اي مەرزىمگە سوتتالدى. ەكى ەپيزود بويىنشا زارداپ شەككەن - ءانشى روزا رىمبايەۆا مەن دەپۋتات داۋلەت تۇرلىحانوۆ.
قىلمىستىق ءىستىڭ ماتەريالدارىنا سايكەس، 2013 جىلى جازدا بەكقايىروۆ تۇرلىحانوۆقا كەلىپ، اسفالت-بەتون زاۋىتىن سالۋعا 1،2 ميلليون دوللار سۇراعان. كاسىپكەر تۇرلىحانوۆقا زاۋىتتىڭ جارتىسىن بەرەتىنىن ايتقان. دەپۋتات سۇراعان اقشاسىن بەرىپ، كەلىسكەن.
الايدا سوتتا ايىپتالۋشى تۇرلىحانوۆتى 1989 جىلدان بەرى تانيتىنىن، ەكەۋى كورشى بولعانىن، ءبىراق دەپۋتاتتان ەشقانداي اقشا الماعانىن ايتقان. سوتتا كاسىپكەر ءقازىر ەشكىم بىرەۋگە 1،2 ميلليون دوللاردى جايدان جاي بەرە المايتىنىن اتاپ وتكەن.
"تەرگەۋ يزولياتورىندا وتىرعان كەزىمدە ەكى تەرگەۋشى مەن تۇرلىحانوۆتىڭ ادامدارى كەلىپ، 2 ميلليون دوللار تالاپ ەتىپ، قورقىتتى. بۇل ەپيزود بويىنشا ايىپتاۋ ويدان شىعارىلعان. داۋلەت تۇرلىحانوۆتىڭ تاراپىنان قورقىتىپ، ۇركىتۋ ءالى ءجۇرىپ جاتىر"، - دەيدى سوتتا بەكقايىروۆ.
