«Samuryq-Qazyna» AQ men qor tobyna kiretin kompaniialar óz qyzmetin shtattyq rejimde jalǵastyryp jatyr. Qordyń investorlar, kreditorlar, halyqaralyq qarjy institýttary jáne iskerlik seriktester aldyndaǵy barlyq mindettemeleri ózgerissiz qalady, dep habarlaidy dalanews.kz.
Qordyń málimetinshe, barlyq mindettemeler qoldanystaǵy kelisimderdiń talaptaryna sáikes oryndalady. Investitsiialyq jobalar men strategiialyq baǵdarlamalar da bekitilgen jospar boiynsha júzege asyrylyp jatyr.
«Samuryq-Qazyna» qarjylyq jáne institýtsionaldyq turaqtylyǵyn saqtap, strategiialyq mindetterin oryndaýdy jalǵastyrýda. Sonymen qatar qor qazaqstandyq jáne halyqaralyq investorlar úshin senimdi seriktes bolyp qala beretinin málimdedi.
Qor óz mindettemeleriniń ózgerissiz qalatynyn jáne barlyq seriktesimen uzaq merzimdi yntymaqtastyqty jalǵastyrýǵa nietti ekenin rastady.
