Mádenıet jáne aqparat mınıstri Aıda Balaeva jemqorlyq isi boıynsha ustalǵan “Biz Birgemiz Qazaqstan” qaıyrymdylyq qorynyń quryltaıshysy Perızat Qaıratqa qatysty pikir bildirdi, dep habarlaıdy Dalanews.kz.
Mınıstrdiń aıtýynsha, bul jaǵdaı qaıyrymdylyq kómek kórsetý júıelerin erekshe nazarǵa alýdy kórsetedi.
“Volonterler qozǵalysynyń belsendisi ári qoǵamdyq qaıyrymdylyq qorynyń quryltaıshysy Perızat Qaıratqa qatysty shýly tergeý qaıyrymdylyq kómek kórsetý júıelerin jetildirý qajet ekenin eske salyp otyr.
Qazirgi kezde Qazaqstanda volonterlik pen qaıyrymdylyq belsendi túrde damyp keledi. Alaıda bul sonymen qatar alaıaqtyq pen paıdakúnemdik áreketterge de qolaıly jaǵdaı týǵyzady. Sondyqtan barlyq qazaqstandyqty qaıyrymdylyq kómek qorlaryn muqıat zertteýge jáne tekserilgen ári senimdi seriktestermen ǵana jumys isteýge shaqyramyn", - dep jazdy mınıstr.
Eske salaıyq, búgin QMA eriktiler qozǵalysynyń belsendisi jáne qoǵamdyq qaıyrymdylyq qorynyń quryltaıshysy Perızat Qaıratqa qatysty tergeý júrgizilip jatqanyn málimdegen edik.
Ol kóktemgi sý tasqynynan zardap shekken azamattarǵa kómektesý úshin jınalǵan 1,5 mlrd teńgeden astam qarajatty jymqyrdy dep kúdikke ilindi.
Qaıyrymdylyqtyń negizgi bóligi qymbat sán buıymdary men jyljymaıtyn múlikti satyp alý maqsatyna paıdalanyldy.
Bıyl kóktemde ol elordadaǵy avtosalondarda 88 mln teńgege "Mercedes-Benz S450", 80 mln teńgege "Lexus LX-600" jáne 39 mln teńgege "Haval" avtokólikterin satyp aldy.
Osy kezeńde ol jalpy somasy 600 mln teńgeni quraıtyn elordanyń premıým sanattaǵy "Akbulak Riviera", "Highvill Ishim Gold", "Kók Jaılaý" TK (turaq oryndaryn qosa alǵanda), sondaı-aq "Vela Village" kotej qalashyǵynda jyljymaıtyn múlik nysandaryn satyp aldy.
Sonymen qatar, qazaqstandyqtardyń qaıyrymdylyqqa jibergen qarajat esebinen Perızat Q. Dýbaı, Doha, London jáne Stambýldaǵy «St. Regis», «Shangri-La», «Palazzo Versace» jáne «Kempinski» sıaqty bes juldyzdy qonaq úılerde demalǵan.
Bul elderde ol "Cartier" jáne "Louis Vuitton" sıaqty brendterdiń qymbat aksesýarlary men zergerlik buıymdardy satyp alyp, feshenebeldi meıramhanalarǵa baryp, ıahtalardy jaldaǵan.
Qylmystyq shemany júzege asyrý úshin dostary men týystaryna 8% syıaqy berip, qordyń aqshasy qolma-qol aqshaǵa aınaldyryp otyrǵan.
Osylaısha, Perızat Q. óziniń zańsyz áreketterimen eriktiler qozǵalysynyń bedeline nuqsan keltirip, onyń ashyqtyq pen adaldyq prınsıpterine kúmán keltirdi jáne halyqtyń senip tapsyrǵan qarajatyn talan-tarajǵa salǵan.
