Búgin, 14 qarashada Jarkent garnizony áskeri bólimderiniń birindegi ofitser jospardan tys sabaqtar ótkizý kezinde alǵan jaraqatynan qaza tapty. Bul jóninde Qurlyq áskerleri qolbasshylyǵynyń baspasóz qyzmeti málim etti, dep habarlaidy Dalanews.kz.
Vedomstvo málimetine sáikes, qaiǵyly jaǵdai diversiiaǵa qarsy qaýipsizdik boiynsha jospardan tys sabaqtar ótkizý kezinde bolǵan.
"Qaýipsizdik sharalaryn buzý saldarynan Jarkent garnizony áskeri bólimderiniń biriniń ofitseri alǵan jaraqatynan qaitys boldy. Bul fakt boiynsha qylmystyq is qozǵaldy, tergeý múddesi úshin ózge aqparat jariia etilýge jatpaidy. Qurlyq áskerleriniń qolbasshylyǵy marqumnyń týystary men jaqyndaryna kóńil aitady, olarǵa barlyq qajetti kómek kórsetiledi", – dep málimdedi baspasóz qyzmeti ókilderi.
Aita keteiik, 7 qarashada da Shekara qyzmeti Shyǵys Qazaqstan oblysy boiynsha departamentiniń merzimdi qyzmettegi áskeri qyzmetshisi qaitys bolǵanyn málimdegen edik.
Jalpy qyrkúiekte áskeri salada birneshe qaiǵyly oqiǵa boldy. Atap aitatyn bolsaq:
7 qyrkúiekte Mańǵystaý poligonynda merzimdi áskeri qyzmetshi jaraqat saldarynan kóz jumdy. Jaýyngerdi vzvod komandiri atyp óltirgen. Qaitys bolǵan sarbazdyń ákesi Qorǵanys ministrine beineúndeý joldady. Qorǵanys ministrligi keiinirek kináliler qatań jaýapkershilikke tartylatynyn málimdedi.
16 qyrkúiekte Qazaqstannyń ońtústigindegi Arys garnizonynyń áskeri bóliminiń kelisimshart boiynsha áskeri qyzmetshisi travmatikalyq qarýdan jaraqat aldy.
19 qyrkúiekte Aiagózde áskeri qyzmetshiniń denesi tabyldy. Áskeri garnizonnyń aldyn ala málimetteri boiynsha ofitser óz-ózine qol jumsaǵan.
22 qyrkúiekte Petropavlda kelisimshart boiynsha áskeri qyzmetkerdiń denesi tabyldy. Bul derek boiynsha qylmystyq is qozǵaldy.
30 qyrkúiekte Aqtaýda dekrettik demalystaǵy áskeri qyzmetshi óz-ózine qol jumsaǵany belgili boldy. Marqum 39 jasta bolǵan, onyń denesi óz páterinde tabylǵan.
Resmi málimetike súiensek, keiingi úsh jylda Qazaqstanda 270 áskeri qyzmetker qaitys bolǵan, al sońǵy tórt jylda áskerde 86 sýitsid tirkelgen, 20 áskeri adam óz-ózine qol salýǵa oqtalǵan.
Ashyq derekkóz málimetteri boiynsha ólim-jitimniń kóp taraǵan sebepteri: aýrý – 36 paiyz, jol apattarynyń saldary – 24 paiyz, sýitsid – 20 paiyz.
