Qazaqstanda qurylys kólemi 15,6%-ǵa ósip, jeńil avtokólik óndirisi 34,2%-ǵa artty. Bul týraly ekonomikalyq ósim jónindegi shtab otyrysynda aityldy, dep habarlaidy dalanews.kz.
Premer-ministrdiń orynbasary Serik Jumanǵarinniń tóraǵalyǵymen ótken jiynda 2026 jyldyń toǵyz aiyndaǵy ekonomikalyq kórsetkishter talqylandy. Úkimet málimetinshe, ishki jalpy ónimniń ósýine qurylys, óńdeý ónerkásibi, kólik jáne saýda salalary negizgi úles qosyp otyr.
Esepti kezeńde qurylys jumystarynyń kólemi 6,1 trln teńgege jetip, ótken jyldyń sáikes kezeńimen salystyrǵanda 15,6%-ǵa ósken. Ósim elimizdiń 18 óńirinde tirkelgen. Jeńil avtokólik óndirisi de aitarlyqtai artyp, 117,2 myń danaǵa jetti. Bul ótken jylmen salystyrǵanda 34,2%-ǵa joǵary kórsetkish.
Turǵyn úi qurylysy salasynda 11,3 mln sharshy metr baspana paidalanýǵa berildi. Bul kórsetkish bir jylda 3,6%-ǵa ósken. Saýda salasyndaǵy taýar ainalymy 51,5 trln teńgeni qurap, 6%-ǵa artty. Al temirjol arqyly tasymaldanǵan astyq kólemi 13,6 mln tonnaǵa jetip, ótken jylmen salystyrǵanda 3 mln tonnaǵa kóbeigen.
Úkimettiń málimetinshe, metallýrgiia salasynda kórsetkish ázirge 97,5% deńgeiinde qalyp otyr. Bilik ókilderi shikizat bazasyn keńeitý baǵytynda jumys júrgizilip jatqanyn habarlady. Sondai-aq aýyl sharýashylyǵy men azyq-túlik óndirisi salalarynda da jyl sońyna deiin turaqty ósim saqtalady dep kútilýde.
