Қазақстанда құрылыс көлемі 15,6%-ға өсіп, жеңіл автокөлік өндірісі 34,2%-ға артты. Бұл туралы экономикалық өсім жөніндегі штаб отырысында айтылды, деп хабарлайды dalanews.kz.
Премьер-министрдің орынбасары Серік Жұманғариннің төрағалығымен өткен жиында 2026 жылдың тоғыз айындағы экономикалық көрсеткіштер талқыланды. Үкімет мәліметінше, ішкі жалпы өнімнің өсуіне құрылыс, өңдеу өнеркәсібі, көлік және сауда салалары негізгі үлес қосып отыр.
Есепті кезеңде құрылыс жұмыстарының көлемі 6,1 трлн теңгеге жетіп, өткен жылдың сәйкес кезеңімен салыстырғанда 15,6%-ға өскен. Өсім еліміздің 18 өңірінде тіркелген. Жеңіл автокөлік өндірісі де айтарлықтай артып, 117,2 мың данаға жетті. Бұл өткен жылмен салыстырғанда 34,2%-ға жоғары көрсеткіш.
Тұрғын үй құрылысы саласында 11,3 млн шаршы метр баспана пайдалануға берілді. Бұл көрсеткіш бір жылда 3,6%-ға өскен. Сауда саласындағы тауар айналымы 51,5 трлн теңгені құрап, 6%-ға артты. Ал теміржол арқылы тасымалданған астық көлемі 13,6 млн тоннаға жетіп, өткен жылмен салыстырғанда 3 млн тоннаға көбейген.
Үкіметтің мәліметінше, металлургия саласында көрсеткіш әзірге 97,5% деңгейінде қалып отыр. Билік өкілдері шикізат базасын кеңейту бағытында жұмыс жүргізіліп жатқанын хабарлады. Сондай-ақ ауыл шаруашылығы мен азық-түлік өндірісі салаларында да жыл соңына дейін тұрақты өсім сақталады деп күтілуде.
