بۇگىن، 14 قاراشادا جاركەنت گارنيزونى اسكەري بولىمدەرىنىڭ بىرىندەگى وفيسەر جوسپاردان تىس ساباقتار وتكىزۋ كەزىندە العان جاراقاتىنان قازا تاپتى. بۇل جونىندە قۇرلىق اسكەرلەرى قولباسشىلىعىنىڭ باسپا ءسوز قىزمەتى ءمالىم ەتتى، دەپ حابارلايدى Dalanews.kz.

ۆەدومستۆو مالىمەتىنە سايكەس، قايعىلى جاعداي ديۆەرسياعا قارسى قاۋىپسىزدىك بويىنشا جوسپاردان تىس ساباقتار وتكىزۋ كەزىندە بولعان.

"قاۋىپسىزدىك شارالارىن بۇزۋ سالدارىنان جاركەنت گارنيزونى اسكەري بولىمدەرىنىڭ ءبىرىنىڭ وفيسەرى العان جاراقاتىنان قايتىس بولدى. بۇل فاكت بويىنشا قىلمىستىق ءىس قوزعالدى، تەرگەۋ مۇددەسى ءۇشىن وزگە اقپارات جاريا ەتىلۋگە جاتپايدى. قۇرلىق اسكەرلەرىنىڭ قولباسشىلىعى مارقۇمنىڭ تۋىستارى مەن جاقىندارىنا كوڭىل ايتادى، ولارعا بارلىق قاجەتتى كومەك كورسەتىلەدى"، – دەپ مالىمدەدى باسپا ءسوز قىزمەتى وكىلدەرى. 

ايتا كەتەيىك، 7 قاراشادا دا شەكارا قىزمەتى شىعىس قازاقستان وبلىسى بويىنشا دەپارتامەنتىنىڭ مەرزىمدى قىزمەتتەگى اسكەري قىزمەتشىسى قايتىس بولعانىن مالىمدەگەن ەدىك.

جالپى قىركۇيەكتە اسكەري سالادا بىرنەشە قايعىلى وقيعا بولدى. اتاپ ايتاتىن بولساق:

7 قىركۇيەكتە ماڭعىستاۋ پوليگونىندا مەرزىمدى اسكەري قىزمەتشى جاراقات سالدارىنان كوز جۇمدى. جاۋىنگەردى ۆزۆود كومانديرى اتىپ ولتىرگەن. قايتىس بولعان ساربازدىڭ اكەسى قورعانىس مينيسترىنە بەينەۇندەۋ جولدادى. قورعانىس مينيسترلىگى كەيىنىرەك كىنالىلەر قاتاڭ جاۋاپكەرشىلىككە تارتىلاتىنىن مالىمدەدى.

16 قىركۇيەكتە قازاقستاننىڭ وڭتۇستىگىندەگى ارىس گارنيزونىنىڭ اسكەري ءبولىمىنىڭ كەلىسىمشارت بويىنشا اسكەري قىزمەتشىسى تراۆماتيكالىق قارۋدان جاراقات الدى.

19 قىركۇيەكتە اياگوزدە اسكەري قىزمەتشىنىڭ دەنەسى تابىلدى. اسكەري گارنيزوننىڭ الدىن الا مالىمەتتەرى بويىنشا وفيسەر وز-وزىنە قول جۇمساعان.

22 قىركۇيەكتە پەتروپاۆلدا كەلىسىمشارت بويىنشا اسكەري قىزمەتكەردىڭ دەنەسى تابىلدى. بۇل دەرەك بويىنشا قىلمىستىق ءىس قوزعالدى.

30 قىركۇيەكتە اقتاۋدا دەكرەتتىك دەمالىستاعى اسكەري قىزمەتشى وز-وزىنە قول جۇمساعانى بەلگىلى بولدى. مارقۇم 39 جاستا بولعان، ونىڭ دەنەسى ءوز پاتەرىندە تابىلعان. 

رەسمي مالىمەتىكە سۇيەنسەك، كەيىنگى ءۇش جىلدا قازاقستاندا 270 اسكەري قىزمەتكەر قايتىس بولعان، ال سوڭعى ءتورت جىلدا اسكەردە 86 سۋيسيد تىركەلگەن، 20 اسكەري ادام وز-وزىنە قول سالۋعا وقتالعان.

اشىق دەرەككوز مالىمەتتەرى بويىنشا ءولىم-جىتىمنىڭ كوپ تاراعان سەبەپتەرى: اۋرۋ – 36 پايىز، جول اپاتتارىنىڭ سالدارى – 24 پايىز، سۋيسيد – 20 پايىز.