Qaıtarylǵan aktıvterdi basqarý kompanıasy 24 shildede qazaqstandyq olıgarhtardan tárkilengen brendtik zergerlik buıymdardyń sátti satylǵany týraly esep berdi, dep habarlaıdy Dalanews.kz.

Saýda nátıjeleri

Saýdaǵa qoıylǵan 56 lottyń tek 18-i ǵana satyldy. Bastapqy baǵasy shamamen 14,8 mln teńge bolǵan áshekeıler aýksıonda 17%-ǵa qymbat baǵaǵa ótip, memleketke 16,9 mln teńge tabys ákeldi.

Jańa ıesin tapqan áshekeılerdiń qatarynda FOPE brendine tıesili bilezik bar – ol 3,5 mln teńgege satyldy (sáýirde ol 3 mln 582 myń teńgege baǵalanǵan bolatyn). Sonymen qatar Picchiotti júzigi, kýlony bar altyn tizbek, ızýmrýdpen, injý-marjanmen jáne gaýhar tastarmen bezendirilgen birneshe júzik jáne ózge de zergerlik buıymdar satylǵan.

Saýda ótpegen lottar men baǵa saıasaty

Qaıtarylǵan aktıvterdi basqarý kompanıasy málimetinshe, 38 zergerlik buıym boıynsha saýda ótpegen.

«Bul - naryqtyq mehanızmniń tabıǵı bóligi. Atalǵan lottar zańǵa saı belgilengen tártippen qaıtadan saýdaǵa shyǵarylady», - dedi kompanıa ókilderi.

Tárkilengen zergerlik buıymdar birtindep satylyp jatyr, alaıda keı brendterdiń baǵasy tym joǵary bolǵandyqtan, olardy birneshe márte arzandatýǵa týra keledi.

Eń qoljetimdi lottar, mysaly, Tiffany & Co syrǵalary, burynnan bastapqy baǵamen satylyp ketken.