Búgingi saǵat 15:30-daǵy jaǵdai boiynsha, KASE-de AQSh dollary ósimin jalǵastyryp, bir táýlikte ústine taǵy 2,79 teńge qosyp aldy. Osylaisha shetel valiýtasynyń ortasha baǵamy 544,87 teńgege jetti. Bul rettegi baǵa ósimi osy apta boiynda kúndelikti oryn aldy. Máselen, 21 shildeden bastap birjada 1 AQSh dollarynyń qunyna 15 teńge ústemelendi (529,44 teńgeden 544,87 teńgege deiin). Eýro da amerikalyq áriptesinen esh qalysyp jatqan joq, osy aptada ol 22 teńgege qymbattap, ortasha baǵamy 639,18 teńgeni qurady, dep habarlaidy Dalanews.kz.
Kurs.kz málimetinshe, búgin aqsha aiyrbas oryndarynda 1 AQSh dollary 540-541 teńgeden satyp alynyp, 547-548 teńgeden satylýda. 1 evro 632-633 teńgeden satyp alynyp, 639-645 teńge aralyǵynda saýdalanýda.
"Valiýta naryǵynda "baǵa jarysy" toqtap, aptyq basylǵan syńaily. 1 AQSh dollarynyń quny 544 teńge mańaiyna shoǵyrlanýda. Bul qarqynnyń baiaýlap, naryqtyń jańa deńgeidi belgileý áreketin tanytady. Iri ofertalar (usynys) ósimdi shekteidi, biraq suranys saqtalyp tur. Qazirgi sátte tepe-teńdik basym, biraq naryq kólemdi ótinimderge qatysty sezimtal kúide, sondyqtan burq etken kez-kelgen qyzyǵýshylyq baǵany qaitadan órge qarai súirelei ala jónelýi múmkin. Al, ázirge 544,30 teńge jáne 544,69 teńge osy ýaqytta súienýge bolatyn baǵdar bolyp tur", - dep jazady "Kommentarii" Telegram-arnasynda ekonomist Eldar Shamsýtdinov.
Buǵan deiin munai salasynyń mamany Oljas Baidildinov jelidegi paraqshasynda teńge baǵamyna qatysty kóktemdegi boljamy aidai kelgenin aityp, jazba jariialaǵan bolatyn.
