Búgin, 27 maýsymda Almaty qalasynda Memleket basshysy Qasym-Jomart Toqaevtyń atynan Buqaralyq aqparat qyzmetkerleri kúnine orai media salasynyń mamandaryna baspana kilti saltanatty túrde tapsyryldy, dep habarlaidy dalanews.kz.
Atap aitqanda, «Qazaqstan», «Habar, «Eýraziia», «KTK», «Z1 arna» telearnalarynyń, «Qazaq gazetteri» JShS, «Jas Alash», «Vremia», «Qazaq ádebieti», «Túrkistan» basylymdarynyń jáne «Shalqar» radiosynyń qyzmetkerlerine, barlyǵy 15 páter berildi.
«Dara» Prezidenttik bastamalar qory uiymdastyrǵan is-sharaǵa Prezident keńesshisi – Baspasóz hatshysy Aibek Smadiiarov arnaiy qatysyp, almatylyq áriptesterdi jańa qonysymen quttyqtady.
– Ózderińiz bilesizder, Prezident otandyq jýrnalistikanyń damýyna udaiy kóńil bóledi. BAQ qyzmetkerleri kúnine orai Aqordada ótken saltanatty jiynda Memleket basshysy Qasym-Jomart Toqaev el men ult múddesi úshin qyzmet etip júrgen jýrnalisterdiń eńbegine erekshe toqtalyp ótip: «Sapaly habar taratyp, qajyrly qyzmet etip júrgen aimaq tilshileriniń eńbegin eleýsiz qaldyrýǵa bolmaidy. Sondyqtan meniń tapsyrmammen osy jyly alǵash ret oblystarda jumys isteitin jýrnalisterge de páter kilti tabystalady», – dep aitqan edi. Osy tapsyrmaǵa sáikes, biyl almatylyq áriptesterimiz de joba igiligin kórip jatyr. Almaty – qazaq baspasóziniń qarashańyraǵy. Kóptegen dástúrli aqparat quraldarynyń tarihy osy shahardan bastaý alady. Memleket basshysy Almaty qalasynyń tynys-tirshiligin árqashan nazarda ustap otyrady, – dedi Aibek Smadiiarov.
Biyl BAQ qyzmetkerlerine 66 páter tabystalady. Onyń ishinde Astana qalasynda – 15, Almaty qalasynda – 15, qalǵan 18 aimaqta 2 páterden bólindi.
Baspanaǵa úmitkerlerdi anyqtaý, páterlerdi daiarlaý jumystaryn «Dara» Prezidenttik bastamalardy qoldaý qory, Prezidenttiń Is basqarmasy, jergilikti atqarýshy organdar men BAQ redaktsiialary birlese júrgizdi.
Atap óterlik jait, ótken úsh jylda Prezident atynan BAQ salasynyń 200 qyzmetkerine baspana berildi.
